Një person është plagosur sonte në Prishtinë, më saktësisht në rrugën “UÇK”. Lajmin e ka konfirmuar për mediat kosovare, zëdhënësja e Policisë së Kosovës për rajonin e Prishtinës, Flora Ahmeti.
“Sot rreth orës 21:00 kemi marrë informacionin për një plagosje me armë zjarri në rrugën ‘UÇK’ në Prishtinë. Menjëherë pas marrjes së këtij informacioni në vendin e ngjarjes kanë dalë të gjitha njësitet e nevojshme policore, të mbështetura edhe nga njësiti rajonal për hetimin e krimeve si dhe njësitë e tjera për ekzaminim të vendngjarjes”, tha ajo.
Ndërkohë mësohet se personi i plagosur sonte (e mërkurë) në Prishtinë është kryetari i tifo-grupit të ‘Plisave’, Rinor Grajqevci.
Ky i fundit është dërguar në spital dhe po merr trajtim mjekësor ndërkohë që policia po punon për zbrdhjen e ngjarjes.
