Mbrëmjen e kësaj të marte, dy këmbësorë janë përplasur për vdekje nga automjetet. Aksidentet kanë ndodhur në Tiranë dhe në Elbasan.
Sipas bluve të kryeqytetit, në zonën e “Misto Mames” dy automjete janë përplasur me njëra-tjetrën dhe si pasojë ka humbur jetën një grua rreth 50 vjece, e cila ishte këmbësore.
“Më datë 17.08.2021, rreth orës 21:00, në “Misto Mame”, dyshohet se janë përfshirë në aksident rrugor mjeti me drejtues I. H., 39 vjeç dhe mjeti me drejtuese shtetasen B. G., 32 vjeçe. Si pasojë ka humbur jetën një shtetase këmbësore ende e paidentifikuar, rreth 50 vjeçe”, thotë policia.
Ndërkohë në Elbasan, një 70-vjeçar u përplas për vdekje nga një makinë, e cila drejtohej nga 61-vjeçari me iniciale S.H.
“Më datë 17.08.2021, rreth orës 20:50, në aksin rrugor Elbasan-Peqin, në fshatin Paulesh, shtetasi S.H., 61 vjeç, banues në Elbasan, duke drejtuar mjetin tip “Mazda”, ka aksidentuar këmbësorin, shtetasin I.H., rreth 70 vjeç, banues në fshatin Pulesh, i cili ka humbur jetën”
Drejtuesi i mjetit është shoqëruar në Komisariatin e Policisë Elbasan për veprime të mëtejshme.
Ndërkohë për të dyja aksidentet, grupi hetimor po punon për të zbardhur rrethanat.
