Kandidatëve për astronautë u kërkohet durim, pasi Agjencia Hapësinore Evropiane është duke përpunuar mbi 23 mijë aplikime për vendet e lira të hapura nga agjencia pak muaj më parë. Ky numër tejkalon shumë parashikimet më optimiste të Agjencisë.
Kreu i Mjekësisë Hapësinore në Qendrën Evropiane të Astronautëve të ESA -së (EAC) Guillaume Ëeerts është pjesë e ekipit që drejton përzgjedhjen e astronautëve. Ai thotë se numri i aplikuesve është një tregues pozitiv i nivelit të interesit për aktivitetet hapësinore në Evropë, por do të duhet pak kohë për t’u realizuar përzgjedhja e tyre.
“Në ESA, ne besojmë fuqimisht se çdo aplikacion duhet të marrë vëmendjen që meriton. Me numrin e konsiderueshëm të aplikantëve, thjesht merr më shumë kohë nga sa ishte parashikuar fillimisht”, shpjegon Guillaume.
“Pas përfundimit të fazës së parashqyrtimit, ne zbuluam se disa aplikacione nuk përmbushnin kërkesat e deklaruara në dokumentacionin në fuqi dhe këta aplikantë u njoftuan menjëherë. Sidoqoftë, më shumë se 80% e të gjitha aplikacioneve të mbetura dhe të pranueshme janë ende në shqyrtim”, shton Antonella Costa e Burimeve Njerëzore në ESA.
Hapi tjetër për kandidatët e suksesshëm është një ftesë për një ditë të plotë testimi në një strukturë në Evropë. Ky hap tashmë ka filluar dhe do të zgjasë të paktën deri në fund të vitit. Kandidatët po ftohen në mënyrë progresive për shkak të punës së përfshirë në këtë proces dhe nevojës për të marrë parasysh kufizimet e udhëtimit të lidhura me COVID-19.
“Nëse nuk jeni ftuar ende, kjo nuk do të thotë domosdoshmërisht që aplikimi juaj nuk po merret parasysh. Ne ju kërkojmë durimin tuaj ndërsa përpunojmë aplikimet dhe lëshojmë këto ftesa”, thotë Antonella.
“Ne me të vërtetë duam të falënderojmë të gjithë ata që e bënë veten përpara. Ne e kuptojmë plotësisht se sa të rëndësishme janë këto aplikime për kandidatët, dhe ne po punojmë që të gjithë ata që aplikuan të dinë rezultatin e aplikimit të tyre sa më shpejt të jetë e mundur”, shton ajo.
Sipas afatit të rishikuar të përpunimit, pritet që të gjithë kandidatët të njoftohen për rezultatin e aplikimit të tyre deri në fund të nëntorit 2021.
