Shtetet e Bashkuara kanë lëshuar një paralajmërim për qeverinë ukrainase se raportimet e fundit të Inteligjencës tregon se Rusia do të nisë menjëherë një pushtim në shkallë të plotë, sipas zyrtarëve ukrainas, amerikanë dhe perëndimorë të njohur me këtë çështje.
Vlerësimi i inteligjencës amerikane vjen pasi liderët e huaj po paralajmërojnë për një sulm të afërt dhe thonë se trupat ruse po lëvizin në rajonin pro-Moskë të Ukrainës lindore. Kryeministri australian Scott Morrison tha në një konferencë për media në Australi, e cila u zhvillua të martën në mbrëmje në kohën lindore, se “Rusia është në gatishmërinë maksimale për të përfunduar tani një pushtim të plotë të Ukrainës”.
Morrison tha se “ka gjasa të ndodhë brenda 24 orëve të ardhshme”.
Të mërkurën në mëngjes, kryeministri i Letonisë, një anëtar i NATO-s, i tha CNN se trupat ruse janë zhvendosur në rajonin separatist të Ukrainës që Rusia tani e ka njohur si “të pavarur”. Më vonë të mërkurën, Pentagoni tha gjithashtu se beson se trupat ruse po lëvizin në rajon.
Mes paralajmërimeve — si dhe deklaratave të presidentit amerikan Joe Biden të martën se pushtimi rus po fillonte — parlamenti i Ukrainës miratoi të mërkurën shpalljen e gjendjes së jashtëzakonshme nga qeveria, e cila do të vendosej në të gjithë vendin duke filluar nga mesnata e së mërkurës.
“Sipas informacionit që kam në dispozicion, Putini po lëviz forca dhe tanke shtesë në territoret e okupuara të Donbasit”, tha kryeministri letonez Arturs Krišjānis Kariņš për CNN. “Sipas çdo përkufizimi, kjo është një kalim i një territori sovran në një vend fqinj.”
I pyeturkonkretisht nëse ai i referohej hyrjes së trupave shtesë ruse që kur Moska njohu dy rajonet separatiste në fillim të kësaj jave, Kariņš u përgjigj: “Po, sipas informacionit që kam në dispozicion, kjo është pikërisht ajo që po shohim”.
Dy burime të tjera të njohura me inteligjencën amerikane konfirmuan për CNN se trupa shtesë ruse në fakt kanë kaluar kufirin në rajonin e Donbasit qëkur Putini njohu dy rajonet dhe lëshoi një urdhër për vendosjen e “paqeruajtësve” në Donbas të martën. Sipas një zyrtari të lartë amerikan, Rusia ka dislokuar një deri në dy të ashtuquajturat grupe taktike batalioni, formacioni kryesor luftarak i Rusisë, secila prej të cilave përfshin mesatarisht rreth 800 trupa.
CNN nuk e ka verifikuar në mënyrë të pavarur praninë e trupave shtesë ruse në Donbas.
Krerët e Republikës Popullore të vetëshpallur të Donetskut dhe Republikës Popullore të Luhanskut, dy rajonet separatiste në Ukrainën lindore, i kërkuan presidentit rus Vladimir Putin të mërkurën ndihmë për të zmbrapsur Forcat e Armatosura të Ukrainës, tha zëdhënësi i Kremlinit Dmitry Peskov për agjencinë shtetërore ruse të lajmeve RIA-Novosti.
