Ushtria ruse, prej disa ditësh ka nisur një ofensivë të re në lindje të Ukrainës, por sipas inteligjencës britanike, ka hasur rezistencë të fortë nga trupat vendase.
Gjithashtu, forcat ruse po vijojnë sulme të njëpasnjëshme në qytetin jugor të Mariupolit, i cili mbetet një objektiv kyç në ofensivën e Moskës.
Presidenti Volodymyr Zelensky është shprehur se kjo javë do të jetë vendimtare për rrjedhën e luftës. Shpresë për arritjen e një marrëveshje mbetet në “duart” e kancelarit austriak Karl Nehgammer, i cili këtë të hënë do të takohet me Presidentin Vladimir Putin në Moskë.
Ky është takimi i parë i një lideri europian me Presidentin e Rusisë që prej fillimit të luftës. Reuters shkruan se pushtimi rus ka lënë një gjurmë vdekjeje dhe shkatërrimi duke sjellë reagimin e vendeve perëndimore të cilët kanë dënuar aktet e Putinit.
Rreth një e katërta e popullsisë së Ukrainës janë detyruar të largohen nga shtëpitë e tyre, qytetet janë kthyer në rrënoja dhe mijëra njerëz janë vrarë dhe plagosur, shumë prej tyre civilë.
Forcat ruse kanë braktisur përpjekjet e tyre për të kapur kryeqytetin Kiev, por po dyfishojnë përpjekjet e tyre në lindje të Ukrainës. Ministria e Mbrojtjes e Britanisë tha se bombardimet ruse vazhduan në rajonet Donetsk dhe Luhansk.
Forcat ukrainase kanë arritur të bëjnë rezistencë ndaj disa sulmeve dhe kishin shkatërruar tanke, automjete dhe pajisje ruse. Në raportin e ministrisë britanike, thuhet gjithashtu se mbështetja e vazhdueshme e Rusisë në bomba të padrejtuara rriti shumë rrezikun e viktimave të mëtejshme civile. Shpërthime të fuqishme tronditën qytetet në jug dhe lindje dhe sirenat e sulmit ajror shpërthyen në të gjithë Ukrainën mëngjesin e së hënës.
Presidenti Zelenskiy vijon fushatën e tij për të marrë mbështetje ndërkombëtare dhe për të mbledhur bashkatdhetarët e tij, duke paralajmëruar se java e ardhshme do të ishte e rëndësishme dhe e tensionuar.
“Trupat ruse do të kalojnë në operacione edhe më të mëdha në lindje të shtetit tonë. Ata mund të përdorin edhe më shumë raketa kundër nesh, edhe më shumë bomba ajrore. Por ne po përgatitemi për veprimet e tyre. Ne do të përgjigjemi.” tha ai në një video adresë natën vonë.
Ai do t’i drejtohej parlamentit të Koresë së Jugut të hënën. Shtabi i përgjithshëm i forcave të armatosura të Ukrainës tha se rusët të përpiqen të ndërpresin linjat e furnizimit dhe të godasin infrastrukturën e transportit.
Ministria ruse e mbrojtjes tha se raketat me precizion të lartë kishin shkatërruar selinë e batalionit të Ukrainës Dnipro në qytetin Zvonetsky. Reuters nuk mundi të konfirmonte raportet.Që nga pushtimi i Rusisë, Zelenskiy u ka bërë thirrje fuqive perëndimore që të ofrojnë më shumë ndihmë në mbrojtje dhe të ndëshkojnë Moskën me sanksione më të ashpra, duke përfshirë embargo në eksportet e saj të energjisë.
Zelenskiy tha se kishte besim në forcat e tij të armatosura, por “për fat të keq nuk kam besim se do të marrim gjithçka që na nevojitet” nga Shtetet e Bashkuara. Rritja e viktimave civile ka shkaktuar reagim të gjerë ndërkombëtar dhe sanksione të reja.
Ludmila Zabaluk, kreu i departamentit të fshatit Dmytriv, në veri të Kievit, tha se dhjetëra trupa civilë u gjetën në zonë.
“Ishin më shumë se 50 të vdekur. Ata i qëlluan nga një distancë e afërt. Është një makinë ku një fëmijë 17-vjeçar u dogj, vetëm kockat i mbetën. Një gruaje iu hoq gjysma e kokës. Pak më larg, një burrë i shtrirë. pranë makinës së tij u dogj i gjallë.” Reuters nuk mundi të konfirmonte raportet.
Moska ka hedhur poshtë akuzat për krime lufte nga Ukraina dhe vendet perëndimore. Ajo ka mohuar vazhdimisht se ka shënjestruar civilët në atë që e quan një “operacion special” për të çmilitarizuar dhe “denazifikuar” fqinjin e saj jugor. Ukraina dhe vendet perëndimore e kanë hedhur poshtë këtë si një pretekst të pabazë për luftë.
