Një raport i gazetës ekonomike gjermane Handelsblatt flet për rezervat gjigante të gazit natyror në Greqi me rastin e fillimit të hetimeve sizmike për hidrokarburet nga Sanco Swift në zonën në jugperëndim të Kretës dhe Peloponezit.
“2000 miliardë metra kub gaz natyror në brigjet greke. Greqia dëshiron të shfrytëzojë rezerva të mëdha. Kryeministri Mitsotakis përshpejton kërkimin e gazit natyror. Shfrytëzimi i tyre mund të fillojë që në vitin 2027. E gjithë Europa mund të përfitojë”, thotë Gerd Heller, korrespondent i gazetës ekonomike Handelsblatt, në një raport nga Athina.
Raporti i gjatë, sipas Deutsche Welle, fokusohet në njoftimet e fundit të kryeministrit Kyriakos Mitsotakis për fillimin e sondazheve sizmike nga anija Sanco Sëift në zonën në jugperëndim të Kretës dhe Peloponezit dhe më pas në Jon për llogari të kompanive Exxon Mobil dhe Hellenic Energy.
Raporti i karakterizon këto veprime si “një lëvizje e re e Greqisë drejt shfrytëzimit të depozitave të gazit natyror në ujërat e saj të hapura” dhe vëren:
“Kjo është një çështje që është lënë mënjanë për vite me radhë për arsye të politikës klimatike, por edhe për shkak të disponueshmërisë së supozuar të besueshme të gazit natyror të lirë rus.Tani lufta në Ukrainë dhe kriza energjetike kërkojnë një rishqyrtim.Greqia tani po kërkon një zëvendësim për gazin natyror rus, i cili në të kaluarën mbulonte 45% të konsumit. Depozitat e mundshme nuk janë vetëm me interes për Greqinë, por bazuar në konsumin e vitit të kaluar, ato do të mjaftonin për të furnizuar të gjithë BE-në me gaz natyror për më shumë se pesë vjet.”
Raporti paraqet gjerësisht të dhënat e disponueshme për depozitat e hidrokarbureve në zonat në jugperëndim të Kretës,të Peloponezit dhe Jonit si dhe oraret e planifikuara për hetimet në këto zona bazuar në vlerësimet e ekspertëve nga organet e përfshira dhe aktorët qeveritarë.
Ndër të tjera në raport theksohet: “Gjithashtu në Egje supozohet se ka depozita hidrokarbure. Megjithatë, deri më tani nuk është bërë asnjë hulumtim atje, sepse Greqia dhe Turqia nuk pajtohen për demarkacionin e zonave ekonomike.Megjithatë, Turqia nuk ka bërë asnjë pretendim për zonat që janë në fokus të hetimeve aktuale”.
