Drejtuesi politik i Koalicionit Euroatlantik, Lulzim Basha, zhvilloi këtë mbrëmje një takim me strukturat dhe mbështetësit në Degën 14 të Tiranës, ku prezantoi katër kandidatët për deputetë të kësaj zone, Alfred Ahmetcenaj, Rajmond Dervishi, Lorina Halilaj dhe Taulanda Jupi.
Në fjalën e tij, Basha theksoi se ndonëse Shqipëria mbetet një demokraci me sfida të mëdha, zgjedhjet e 11 majit janë një mundësi e çmuar që qytetarët të rikthejnë pushtetin në duart e tyre. Ai u bëri thirrje shqiptarëve të reflektojnë para se të votojnë, duke parë votën si një akt besnikërie ndaj vetes, fëmijëve dhe të ardhmes.
“Pyetja është e thjeshtë: A jeni me fëmijët tuaj apo me Edi Ramën? A jeni me Shqipërinë, apo me ata që për 12 vite e kthyen në simbol të korrupsionit dhe largimit masiv?” – deklaroi ai.
Basha u ndal edhe tek premtimet e pambajtura të qeverisë, që sipas tij, kanë degraduar sistemin shëndetësor, e kanë çuar pronën në kaos dhe kanë mashtruar qytetarët me legalizime, vende pune dhe politika klienteliste. “Më 11 maj, nuk do të ketë zgjedhje pa zgjidhje. Rama e projektoi këtë që në shtator 2021 – një skenar për të pasur një opozitë fasadë, me aktorë që e kanë kthyer hallin personal në pengesë për një alternativë reale. Por qytetarët e dinë: pazari i tyre ka marrë fund”, u shpreh Basha.
Ai nënvizoi mbështetjen pa kushte për SPAK dhe drejtësinë e pavarur si një nga shtyllat kryesore të programit të Koalicionit Euroatlantik, duke theksuar se vetëm fundi i pandëshkueshmërisë mund të hap rrugën për zhvillimin ekonomik dhe integrimin europian.
“Ne jemi e vetmja forcë që i thotë po drejtësisë, po transparencës dhe po vlerave që Shqipëria meriton. Ne nuk jemi të lidhur me askënd që i trembet hetimeve. Lista jonë është e hapur dhe e pastër. E vetmja zgjidhje është Koalicioni Euroatlantik – numri 4 në fletën e votimit” – përfundoi Basha.
Pjesë nga fjala e Bashës:
Sepse, një herë në katër vjet, edhe në një demokraci, larg perfeksionit, një demokraci hibride, siç e cilësojnë raportet perëndimore, me institucione të dobëta me korrupsion të madh, me një mijë e një, probleme, prapë se prapë, një herë në katër vite, ato 24 orë, pushteti kthehet tek qytetari. Dhe, me të gjitha difektet e demokracisë shqiptare, më 11 maj, pyetja kryesore që shqiptarët duhet të bëjnë, para se të kryejnë këtë detyrë qytetare, kombëtare, familjare, ndaj fëmijëve tuaj, ndaj nipërve tuaj dhe për të rinjtë që votojnë për herë të parë, ndaj prindërve tuaj dhe ndaj vetes tuaj dhe shokëve tuaj është: A jeni me shokët tuaj, apo jeni me Edi Ramën? A jeni me familjet tuaja, apo jeni me Edi Ramën? A jeni me fëmijët tuaj, apo jeni me Edi Ramën? A jeni me Shqipërinë, apo jeni me Edi Ramën?
Se të dyja bashkë nuk qëndrojnë! Kjo është pak, por e sigurtë.
Nuk ka çfarë t’i thuash një nëne apo babai, që për herë të katërt, pranon të merret zvarrë si dele, dhe të çojë votën tek dikush që: i ka përzënë shqiptarët masivisht; që është i zhytur deri në fyt në korrupsion bashkë me shokët e tij, tek 313; që premtoi 300 mijë vende pune dhe përzuri masivisht shqiptarët; që premtoi shëndetësi falas dhe e falimentoi shëndetësinë; që premtoi legalizime falas dhe e ka futur problemin e pronave në kolaps si me të palegalizuarit ashtu edhe me ndërtimet e reja, ashtu me tokat bujqësore, tokat truall dhe çdo gjë tjetër. Pra, një njeri që s’ka çfarë të thotë më, para çdo palë zgjedhje hap premtime të reja.
Më 11 maj, nuk do të ketë zgjedhje pa zgjidhje. Edi Rama donte të shkonte kështu. E ka projektuar këtë punë që nga shtatori i 2021-shit. Që atëherë, ai ka vendosur: do të shfrytëzonte si kapital politik sjelljen mendjengushtë dhe egoiste të atij që i kishin vënë spaletat më të mëdha këto 35 vjet. Do të shfrytëzonte faktin që ai, hallin e vet dhe të familjes së tij, e bëri hallin e demokratëve, opozitarëve dhe të gjithë shqiptarëve. Që të shkonte në zgjedhje dhe të thoshte: o unë, o bufi!
Jua kemi prishur pazarin. Jua kemi prishur qetësinë. E keni parë se si sillen. Ata sillen si pula pa kokë, në veçanti njëri që e ka humbur toruan fare dhe që as montazhierët, as redaktori, kryeredaktori — siç i thotë njëri që e ka çuar në Durrës — nuk i bëjnë dot derman. Sepse ne jemi sot, e gjithë ditën, e vetmja forcë politike që dalim para shqiptarëve dhe i shohim në sy, dhe ju themi:
Ne jemi 100% në mbështetje të drejtësisë së pavarur. Ne jemi 100% në dispozicion të drejtësisë së pavarur. Ashtu si shumica dërrmuese e shqiptarëve. Opozitarëve të vërtetë po se po, por edhe socialistëve të neveritur me qeverisjen e korruptuar të Edi Ramës.
Ne i japim mbështetje 100% SPAK-ut, sepse duam fundin e pandëshkueshmërisë. Që është hapi i parë i vërtetë drejt një Shqipërie të standardeve ekonomike, shëndetësore, sociale, arsimore, standardeve europiane.
