Në natën finale të “X Factor”, Arilena Ara “braktis” karrigen e jurisë dhe ngjitet në skenën e madhe të talent show. Pikërisht në atë skenë madhështore që i hapi rrugën drejt muzikës dhe suksesit…
Artistja e mirënjohur dhuroi një superperformancë duke interpretuar këngën e saj “Zero gradë”, me të cilën konkurroi në spektaklin “Kënga Magjike 2024”, së bashku me kompozitorin e njohur Pirro Çako.
Ara është një këngëtare që ka spikatur gjithmonë me zërin e saj. Ajo ka arritur majat edhe pse në një moshë të vogël. Televizioni Klan ka qenë për të gjithnjë një trampolinë drejt suksesit. Në një moshë fare të vogël Arilena Ara konkurroi në “Gjeniu i Vogël”, më pas në “X Factor”, ku dhe fitoi çmimin e parë.
Në Nëntor të vitit 2016, ajo u ngjit në skenën e “Këngës Magjike” me këngën “Nëntori”, e cila u kthye menjëherë në hit ndërkombëtar.
Për artisten e njohur mund të themi me bindje se skena e “X Factor” është kthyer në një shtëpi të dytë. Gjatë këtij edicioni të spektaklit që promovon talentet e rinj, Arilena Ara ka qenë pjesë e 4 anëtarëve të jurisë dhe mentore e grupit të vajzave.
Finalen e madhe të 4 Prillit, në “X Factor” ajo vjen me kokën lart. Misioni i saj si mentore është përmbushur, pasi në natën finale ngjitet krah Rigersës dhe Leandrës, 2 vajza të grupit të saj, të cilat konkurrojnë për çmimin e madh./tvklan.al
