“Nuk ka shpëtim nga tarifat që vendosi presidenti amerikan Donald Trump!” Ky është mesazhi që transmetuan zyrtarët e qeverisë amerikane, të cilët janë të angazhuar për politikat ekonomike dhe tarifore të parashikuara nga Presidenti.
Siç tregohet edhe nga deklaratat e zyrtarëve të administratës Trump në mediat amerikane, askush nuk duhet të shpresojë për ndonjë “lehtësim” të papritur në lidhje me tarifat që do të hyjnë në fuqi të mërkurën.
“Tarifat do të vijnë. Këtë e njoftoi dhe nuk po bëhet fjalë për shaka. Tarifat do të vijnë, natyrisht që do të vijnë”, tha ministri i Tregtisë, Howard Lutnick, në programin “Face the Nation” të CBS.
Ai theksoi gjithashtu se presidenti duhej të rregullonte tregtinë globale, duke i parë tarifat si një mënyrë për të rikthyer sigurinë kombëtare dhe për të restauruar prodhimin amerikan.
Po në të njëjtën linjë, ministri amerikan i Financave, Scott Beset, foli në programin “Meet the Press” të NBC. Kur u pyet nëse Trump ishte i hapur për bisedime për tarifat, Beset u përgjigj pa hezitim. “Jo, jo, jo, jo. Mendoj se duhet të ecim përpara”, tha Beset.
Që kur u njoftuan tarifat, ato shkaktuan një rënie të madhe të aksioneve në bursat globale, me investitorët që humbën mbi 6 trilionë dollarë.
Ekonomistët besojnë gjerësisht se tarifat, nëse nuk hiqen, do të shkaktojnë rritje të inflacionit dhe rënie të zhvillimit, dhe përfundimisht do të çojnë në një recesion në SHBA dhe në mbarë botën.
Nga ana tjetër, drejtori i Këshillit Ekonomik Kombëtar, Kevin Hassett, dhe këshilltari i lartë për tregtinë, Peter Navarro, besojnë se amerikanët e zakonshëm “nuk shqetësohen aq shumë për luhatjet e tregut sa për mënyrën se si media e përshkruan atë”.
