Në mes të një lufte tregtare me Kinën që i ka çuar tregjet financiare në një udhëkryq, SHBA ka ndryshuar qëndrimin e saj, duke përjashtuar smartfonët, kompjuterët dhe disa produkte të tjera elektronike të importuara kryesisht nga Kina nga tarifat e fundit ‘reciproke’ të vendosura nga Presidenti Donald Trump, duke i dhënë një frymëmarrje të madhe kompanive teknologjike si “Apple” që mbështeten në produktet e importuara.
Në një përditësim zyrtar, agjencia amerikane e mbrojtjes së doganave dhe kufirit publikoi një listë me kode specifike që përjashtohen nga detyrimet e importit, me efekt prapaveprues nga 5 prilli.
Kjo përfshin 20 kategori produktesh, si kodi 8471 që ka të bëjë me të gjithë kompjuterët, laptopët, hard disqet dhe përpunimin automatik të të dhënave. Përfshihen gjithashtu pajisje gjysmëpërçuese, çipa memori dhe monitorë kompjuterësh me panele të sheshta.
Asnjë shpjegim nuk u dha për këtë vendim në këtë përditësim, por përjashtimi u jep një frymëmarrje konsumatorëve amerikanë, të cilët rrezikojnë të shohin çmimet e këtyre produkteve të njohura të “shkojnë në stratosferë”.
Kompania që do të përfitojë nga këto ndryshime është “Apple” , e cila prodhon iPhone dhe produktet e tjera kryesore në Kinë. Gjithashtu do të përfitojë edhe “Dell Technologies”. Produktet e përjashtuara përfaqësojnë më shumë se 20% të importeve amerikane nga Kina, sipas të dhënave të doganave amerikane të cituara nga eksperti i Kinës Gerard DiPippo.
I pyetur për arsyet e përjashtimeve dhe planeve për gjysmëpërçuesit, Trump u tha gazetarëve në Air Force One: “Unë do t’ju jap përgjigjen të hënën. Do të jem shumë specifik të hënën.”
Dan Ives, një analist në Wedbush Securities, tha se njoftimi ishte lajmi më pozitiv që dikush mund të dëgjonte këtë fundjavë.
“Ka ende pasiguri dhe paqëndrueshmëri me këto negociata me Kinën… Gjigantët e mëdhenj të teknologjisë si Apple, Nvidia, Microsoft dhe industria më e gjerë e teknologjisë mund të marrin një frymë të madhe këtë fundjavë deri të hënën,” tha Ives.
Përjashtimet e fundit tregojnë se administrata Trump po fillon gjithnjë e më shumë të kuptojë ndikimin që mund të kenë tarifat tek konsumatorët. Edhe me një tarifë më të ulët prej 54% për importet kineze, analistët parashikojnë se çmimi i një modeli më të mirë të Apple iPhone mund të rritet në 2,300 dollarë nga 1,599 dollarë. Me një tarifë prej 125%, ekonomistët dhe analistët argumentojnë se kjo mund të frenojë në mënyrë efektive tregtinë SHBA-Kinë.
Telefonat ishin produkti më i madh i importuar i SHBA nga Kina në vitin 2024, me një total prej 41.7 miliardë dollarësh me laptopët e prodhimit kinez që vijnë në vendin e dytë, me 33.1 miliardë dollarë, sipas Byrosë së Regjistrimit të SHBA.
Apple kohët e fundit ka marrë me qira avionë mallrash për të transportuar 600 tonë iPhone, ose rreth 1.5 milionë telefona celularë, në SHBA nga India, pasi rriti prodhimin e saj atje në një përpjekje për të kundërshtuar tarifat e Trump.
