Prokuroria në Foggia të Italisë ka kërkuar dënimin me burgim të përjetshëm dhe izolim gjatë ditës për shtetasin shqiptar Taulant Malaj, 47 vjeç, i akuzuar për një ngjarje të rëndë që tronditi opinionin publik dy vite më parë në komunën e Torremaggiore.
Sipas hetimeve, më 7 maj, Malaj vrau me thikë 51-vjeçarin Massimo De Santis, i dyshuar si i dashuri i bashkëshortes së tij, dhe vajzën e tij 16-vjeçare, Jessica, e cila tentoi të mbronte nënën. Gruaja e Malajt mbijetoi, por mbeti e plagosur rëndë nga sulmi.
Prokurorët Antonio Laronga dhe Sabrina Cicala argumentuan se vrasjet ishin të planifikuara dhe të kryera me qëllim ndëshkimi, pa asnjë rrethanë lehtësuese. Ata paraqitën prova video nga vendngjarja, ku Malaj shihet dhe dëgjohet duke pranuar krimin: “Shikoni atje, unë vrava, e bëra vetëm,” deklaron ai në pamjet e shfaqura në sallën e gjyqit.
Gjatë fjalës përfundimtare, prokuroria theksoi se nuk ka asnjë element që mund të justifikojë ose të zbusë përgjegjësinë e të pandehurit për atë që cilësohet si një nga ngjarjet më të rënda kriminale në rajonin e Capitanata në vitet e fundit.
Vendimi përfundimtar i gjykatës pritet të shpallet në javët në vijim.
