Presidenti i SHBA-ve, Donald Trump, paralajmëroi të martën se do të përdorë “forcë” kundër “kujtdo” që proteston në paradën ushtarake të kësaj fundjave në Uashington.
“Do të kemi një festë të madhe të shtunën ”, u tha Trump gazetarëve në Zyrën Ovale, duke shtuar: “Nëse shfaqet ndonjë protestues, ai do të përballet me forcë shumë të fortë”, paralajmëroi ai.
Parada ushtarake, e organizuar për të nderuar 250-vjetorin e Ushtrisë, përkon me 79-vjetorin e lindjes së presidentit amerikan dhe vjen disa ditë pas dërgimit të trupave në Los Angeles për t’u përballur me protestat kundër operacioneve të Shërbimit Amerikan të Imigracionit dhe Doganave (ICE).
“Kushdo që dëshiron të protestojë do të përballet me forcë të fortë”, përsëriti Trump, duke shtuar megjithatë se deri më tani nuk ka informacion në lidhje me protestat e organizuara në këtë ngjarje.
“Ata që mendojnë kështu e urrejnë vendin tonë. Ata do të përballen me forcë të fortë.”
Trump ka theksoi madhësinë dhe spektaklin e paradës që do të mbahet në fundjavë.
“Kemi shumë tanke. Kemi të reja dhe shumë të vjetra nga Lufta e Parë Botërore dhe Lufta e Dytë Botërore”, tha ai të hënën, duke shtuar se sukseset ushtarake të Shteteve të Bashkuara në dy luftërat botërore duhen festuar, siç bëjnë vendet e tjera.
” Do të jetë një paradë si nuk e kemi parë kurrë më parë. Do të jetë e pabesueshme”, tha ai, duke vënë në dukje se “mijëra ushtarë” do të marshojnë. “Do të kemi shumë aeroplanë ushtarakë që fluturojnë sipër dhe tanke kudo”.
Sipas raportimeve, në paradë do të marrin pjesë 28 tanke Abrams, 28 automjete të blinduara Bradley, 28 automjete Stryker dhe katër topa vetëlëvizës Paladin, ndërsa 50 avionë do të fluturojnë mbi Uashington.
“E shtuna do të jetë një ditë e madhe në Uashington “, tha Trump, duke folur para ushtarëve në Fort Bragg.
Sipas vlerësimeve të Ushtrisë, më shumë se 6,000 ushtarë do të marrin pjesë në ngjarje.
