Janë publikuar pamje të reja të kamerave të sigurisë lidhur me atentatin ndaj senatorit dhe kandidatit për president në Kolumbi, Miguel Uribe Turbay, i ndodhur më 7 qershor në lagjen Modelia të Bogotas.
Pamjet tregojnë qartë momentet para sulmit dhe përfshirjen e disa personave në një akt të mirëplanifikuar kriminal.
Sipas videove të siguruara nga Noticias Caracol, agresori i dyshuar – një i mitur – mbërrin me një motoçikletë, i shoqëruar nga një makinë gri e errët me dy persona. Pasi zbret në një cep, ai ecën për më shumë se katër blloqe rrugë deri në parkun ku Uribe Turbay po mbante një takim me komunitetin dhe aty hap zjarr.
I mituri u arrestua dhe iu ngritën akuzat për vrasje në tentativë dhe trafikim e mbajtje të paligjshme të armëve, të cilat ai nuk i pranoi. Megjithatë, bazuar në provat, Prokuroria kërkoi masë paraburgimi në një qendër për të mitur.
Autoritetet kanë identifikuar pesë persona të tjerë të përfshirë, si dhe dy automjete të përdorura në atentat. Të gjithë janë në kërkim dhe hetimet po avancojnë.
Burime brenda Prokurorisë kanë bërë të ditur se i mituri mund të jetë duke kërkuar një marrëveshje bashkëpunimi me drejtësinë në këmbim të lehtësimeve ligjore, një mundësi që po shqyrtohet nga autoritetet.
I riu ndodhet aktualisht në paraburgim në selinë qendrore të Prokurorisë për të garantuar sigurinë e tij dhe ndoshta për të siguruar dëshmi që mund të çojnë në zbardhjen e plotë të ngjarjes.
Zyrtarisht, autoritetet kolumbiane kanë përjashtuar çdo përfshirje të mafies shqiptare në këtë atentat, duke e cilësuar ngjarjen si një sulm të organizuar lokal me motive ende në hetim.
