Tensionet mes Iranit dhe Izraelit mund të hyjnë në një fazë edhe më të rrezikshme, paralajmëron diplomati amerikan Robert Malley, ish-negociatori kryesor i marrëveshjes bërthamore me Iranin gjatë presidencës së Obamës.
Në një intervistë për BBC, Malley e përshkroi situatën si “një fuçi baruti që tashmë ka shpërthyer” dhe tha se përplasjet e fundit mes dy vendeve “mund të zgjasin dhe të marrin një drejtim më të rrezikshëm”.
Bisedimet e planifikuara për të dielën në Oman mes Iranit dhe administratës amerikane, që pritej të ringjallnin dialogun për çështjen bërthamore, janë anuluar. Sipas ndërmjetësit Oman, Irani beson se bisedimet ishin një mashtrim nga SHBA dhe Izraeli për ta bërë atë të besonte se nuk do të kishte sulm.
Malley theksoi se, ndonëse sulmet izraelite kanë arritur “një sukses të jashtëzakonshëm ushtarak dhe informativ”, Irani vazhdon të mbajë njohuri dhe kapacitete të konsiderueshme bërthamore.
Sipas tij, rifillimi i bisedimeve serioze me Iranin është shumë pak i mundshëm në të ardhmen e afërt.
