Sot u zhvillua ceremonia zyrtare e hapjes së selisë së re të Ambasadës së Shqipërisë në Vatikan. Në këtë ngjarje morën pjesë përfaqësues të lartë nga diplomacia shqiptare dhe ajo ndërkombëtare.
Ministri për Evropën dhe Punët e Jashtme, Igli Hasani, ishte i pranishëm në ceremoni së bashku me Sekretarin për Marrëdhëniet me Shtetet të Selisë së Shenjtë, Imzot Paul Richard Gallagher, si dhe Ministrin e Jashtëm të Urdhrit Sovran të Maltës, Riccardo Paternò di Montecupo.
Gjatë fjalës së tij, Ministri Hasani tha se hapja e ambasadës së re është një simbol i rëndësishëm i marrëdhënieve të mira mes Shqipërisë dhe Selisë së Shenjtë. Ai theksoi se këto marrëdhënie ndërtohen mbi vlera të përbashkëta si paqja, respekti për njeriun dhe dialogu ndërfetar.
“Kjo shtëpi e re e diplomacisë do të ndihmojë për të ndërtuar ura bashkëpunimi dhe mirëkuptimi mes popujve,” tha Hasani.
Ceremonia shënon një moment domethënës në konsolidimin e pranisë diplomatike shqiptare në Vatikan dhe angazhimin e saj për bashkëpunim ndërkombëtar të frytshëm.
