Një gjykatë shqiptare nisi të hënën gjyqin për akuza korrupsioni ndaj ish-kryeministrit Sali Berisha, i cili drejton Partinë Demokratike në opozitë.
Gjyqi për Berishën, 80 vjeç, po zhvillohet në Gjykatën e Posaçme kundër Korrupsionit dhe Krimit të Organizuar, e cila trajton çështje që përfshijnë zyrtarë të lartë dhe politikanë. Në këtë proces gjyqësor janë të përfshirë edhe dhëndri i tij, Jamarbër Malltezi, dhe tre persona të tjerë.
Në tetor 2023, prokuroria nisi hetimet ndaj Berishës, i cili akuzohet se ka abuzuar me detyrën për të ndihmuar dhëndrin e tij të privatizojë një truall publik në kryeqytetin Tiranë, ku më pas janë ndërtuar 17 pallate.
Në shtator 2024, Berisha u akuzua zyrtarisht për korrupsion në lidhje me këtë marrëveshje pronësie. Ai i ka mohuar akuzat, duke i cilësuar si një formë represioni politik të urdhëruar nga kryeministri Edi Rama i Partisë Socialiste.
Të hënën, Berisha u paraqit në zyrën e prokurorit, siç e ka detyrim çdo dy javë, por nuk shkoi në gjykatë, ku u përfaqësua nga avokatët e tij.
“Pjesëmarrja ime apo jo në seancë përcaktohet nga avokatët e mi dhe natyrisht në përputhje me ligjet,” u tha ai gazetarëve. “Ajo është një seancë ku avokatët e mi do të paraqesin pretendimet e tyre.”
Berisha ka qenë kryeministër nga viti 2005 deri në 2013 dhe më parë president nga viti 1992 deri në 1997. Në zgjedhjet parlamentare të vitit 2024, ai u rizgjodh si deputet i Partisë Demokratike me orientim të djathtë konservator.
Qeveria e Shteteve të Bashkuara në maj 2021 dhe ajo e Mbretërisë së Bashkuar në korrik 2022 ndaluan hyrjen e Berishës dhe anëtarëve të afërt të familjes së tij për shkak të përfshirjes së pretenduar në korrupsion.
Korrupsioni mbetet një nga çështjet kryesore që ka ndikuar negativisht në Shqipëri që nga rënia e regjimit komunist në vitin 1990.
Përveç Berishës, edhe ish-presidenti Ilir Meta dhe anëtarë të tjerë të koalicionit opozitar të tij janë ndaluar dhe po hetohen për akuza korrupsioni. Të dy pretendojnë se akuzat janë të motivuara politikisht dhe akuzojnë qeverinë për korrupsion.
Në tetor të vitit të kaluar, Tirana nisi zyrtarisht negociatat për anëtarësim të plotë me Bashkimin Evropian, në kuadër të përafrimit me standardet e BE-së për shtetin e së drejtës, funksionimin e institucioneve demokratike dhe luftën kundër korrupsionit. Shqipëria synon të anëtarësohet në BE deri në vitin 2030, sipas deklaratave të kryeministrit Rama./
