India dhe Britania e Madhe kanë nënshkruar një marrëveshje historike të tregtisë së lirë, e cila pritet të sjellë miliarda paund përfitime për të dyja vendet. Kryeministri indian Narendra Modi dhe homologu i tij britanik, Keir Starmer, firmosën paktin gjatë një ceremonie në rezidencën zyrtare të kryeministrit britanik në Chequers.
Sipas marrëveshjes, mallrat britanike si makinat luksoze dhe uiski do të eksportohen në Indi me kosto më të ulët, ndërsa tekstilet dhe bizhuteritë indiane do të kenë akses më të lirë në tregun britanik. Përveç përfitimeve tregtare, marrëveshja përfshin edhe një plan të përbashkët për të luftuar emigracionin e paligjshëm dhe krimet e organizuara.
“Marrëveshja është firmosur, vulosur dhe dorëzuar,” deklaroi Starmer. “Është marrëveshja më e madhe dhe më me peshë ekonomike që Britania ka arritur që prej daljes nga BE-ja. Jemi duke dërguar një mesazh të fuqishëm se Britania është e hapur për biznes.”
Kryeministri britanik tha gjithashtu se kjo marrëveshje do të krijojë mbi 2,200 vende pune në Britani, falë zgjerimit të kompanive indiane në territorin britanik dhe zgjerimit të bizneseve britanike në tregun indian.
Nga ana tjetër, Modi e përshkroi paktin si një “plan për mirëqenien e përbashkët”, duke theksuar se India do të ketë qasje më të lehtë në produkte britanike si pajisje mjekësore dhe pjesë për industrinë ajrore.
Çfarë përfshin marrëveshja
Heqje apo ulje drastike të tarifave për produkte si: veshje, automjete, këpucë, ushqime, pije alkoolike, bizhuteri dhe pajisje teknologjike.
Ulje e tarifës së uiskit britanik nga 150% në 75% menjëherë dhe më pas në 40% deri në vitin 2035.
Rritje e aksesit për prodhuesit indianë në tregun britanik për automjete elektrike dhe hibride.
Ulje e tarifave për eksportet britanike nga mesatarisht 15% në 3%.
Bashkëpunim përtej tregtisë
Dy liderët ranë dakord gjithashtu për të forcuar bashkëpunimin në fushat e mbrojtjes, arsimit, teknologjisë së gjelbër, sigurisë kibernetike dhe ndryshimeve klimatike. Një marrëveshje e re për shkëmbimin e të dhënave kriminale do të ndihmojë në ndjekjen penale dhe ndalimin e udhëtimeve të rrezikshme.
Megjithatë, marrëveshja nuk i dha Britanisë akses të plotë në sektorët e financës dhe ligjit në Indi. Negociatat për një traktat të veçantë për investime mbeten ende në tryezë.
Zyrtarët britanikë theksuan gjithashtu se marrëveshja për kontributet e sigurimeve shoqërore, që shmang pagesën e dyfishtë për punonjësit e përkohshëm, nuk i jep asnjë përparësi punonjësve indianë ndaj atyre britanikë.
“Nuk ka asnjë përfitim tatimor për të punësuar një punonjës indian në vend të një britaniku,” tha ministri i Biznesit, Jonathan Reynolds.
Por ndërkohë që qeveria britanike e konsideron marrëveshjen një sukses historik, kritikët kanë ngritur shqetësime për mungesën e qasjes së plotë në tregjet indiane dhe efektet e Brexit-it në tregtinë britanike me BE-në. Opozita thotë se marrëveshja nuk e kompenson humbjen e tregut europian dhe akuzon qeverinë për sjellje kontradiktore ndaj bizneseve.
Samiti gjithashtu u shënua nga ngritja e çështjes së Jagtar Singh Johal, një aktivist britanik i burgosur në Indi pa një vendim gjyqësor, që Starmer e përmendi gjatë takimit me Modi.
Marrëveshja e re përforcon marrëdhëniet dypalëshe në një kohë kur India po kërkon të zgjerojë ndikimin e saj ekonomik dhe diplomatik në arenën ndërkombëtare dhe Britania pas Brexit-it është në kërkim të aleancave të reja tregtare.
