Të treja skuadrat shqiptare Egnatia, Vllaznia dhe Dinamo kanë arritur të marrin nga një fitore në ndeshjet e para të raundit të dytë eliminator të Conference League.
Vllaznia fitoi 2-1 ndaj Vikingur Reykjavik në Shkodër, në ndeshjen e parë të turit të dytë të Conference League.
Ndeshja u zhbllokua shumë shpejt, që në minutën e 10-të. Mysafirët nga Islanda ndëshkuan shkodranët me Gunnarsson, i cili realizoi me kokë.
Në pjesën e parë, të besuarit e Edi Martinit provuan të reagojnë dhe goditën dy herë portën e kundërshtarit, por pa mundur dot të finalizojnë si duhet.
Në pjesën e dytë, ishte Bajrami ai që vendosi ekuilibrat, me golin e tij në të 67-tën.
Vllaznia përmbysi ndeshjen me golin e Malës, çerek ore nga fundi. Takimi i kthimit luhet pas disa ditësh.
Natë pozitive kjo për skuadrat shqiptare, teksa përveç Dinamos e Vllaznisë, ia del me sukses edhe Egnatia. Kampionët e Shqipërisë mundën 0-2 Dinamon e Minskut, në sfidën e parë të turit të dytë të Conference League.
Në Hungari, Lushkja realizoi për të besuarit e Tetovës pak pa u mbushur 30 minuta lojë. Goli i sigurisë për Egnatian erdhi vetëm në fund dhe mban firmën e Bakayoko.
Skuadra bjelloruse nuk pati më kohë për të bërë diçka, duke u detyruar të pajtohet me rezultatin. Takimi i kthimit do të zhvillohet me 31 korrik.
Më herët , Dinamo arriti gjithashtu të fitojë ndeshjen e parë të raundit të dytë eliminator të Conference League përballë Atletic Escaldes në Andorra me shifrat 2-1. Në debutimin e tyre në Europë pas 15 vitesh mungesë, blutë e kryeqytetit e nisin me këmbën e mbarë duke marrë një fitore të merituar në transfertë.
Vendasit kaluan të parët në avantazh me kapiteni Vieira në minutën e 43-të, por në pjesën e dytë djemtë e Dajës i kundërpërgjigjen me Zabërgjën dhe Qardakun për të siguruar një rezultat shumë të mire dhe që I mban shumë pranë kualifikimit për në raundin e tretë, por gjithçka do të zyrtarizohet një javë më pas në ndeshjen e kthimit në “Elbasan Arena”.
