Siria pritet të mbajë zgjedhjet e para parlamentare në shtator, sipas informacioneve nga agjencia shtetërore e lajmeve SANA.
Sipas Mohamed Taha, kreut të procesit zgjedhor, votimi për Asamblenë Popullore, siç quhet parlamenti në Siri, do të mbahet gjatë gjashtë ditëve. Nga data 15 deri më 20 shtator.
Këto do të jenë zgjedhjet e para parlamentare në vendin e Lindjes së Mesme, pas rënies së Presidentit Bashar Al-Assad dhe regjimit të tij, dhe marrjes së pushtetit nga rebelët e Hayat Tahrir al-Sham (HTS), nën Ahmed Al-Sarra.
Marrëdhëniet me Izraelin
Njoftimi vjen në një kohë kur marrëdhëniet e Sirisë me Izraelin janë të tensionuara nga përleshjet në jug të vendit midis militantëve islamikë dhe druzëve. Izraeli ka bombarduar disa zona, përfshirë Damaskun, duke pretenduar se dëshiron të mbrojë druzët.
Siria ka dalë nga një luftë civile gati 14-vjeçare që ka shkatërruar shoqërinë dhe infrastrukturën. Tani ajo drejtohet nga një qeveri e përkohshme e udhëhequr nga Hayat Tahrir al-Sham (HTS), një ish-degë e lidhur me al-Kaedën.
Kushtetuta në pezullim
Me kushtetutën e vendit, e cila ka qenë në fuqi që nga koha e Bashar al-Asadit, të pezulluar, një kushtetutë e re do të duhet të hartohet pas zgjedhjeve dhe nga parlamenti i ri.
Regjimi i ri po përpiqet të rivendosë marrëdhëniet e Sirisë me pjesën tjetër të botës dhe të sigurojë burime dhe investime.
Presidenti i përkohshëm i Sirisë ka deklaruar se do të duhen të paktën tre ose katër vjet për të formuar një qeveri të re.
Komuniteti ndërkombëtar po ushtron presion mbi qeverinë e re që të respektojë dhe mbrojë të drejtat e pakicave – etnike dhe fetare – dhe të grave, të cilat mbeten të paqarta.
