Presidenti i SHBA-së, Donald Trump, deklaroi se ka “shanse të mira” për një samit të afërt me presidentin rus Vladimir Putin dhe presidentin ukrainas Volodymyr Zelensky, në përpjekje për t’i dhënë fund luftës në Ukrainë.
Komentet u bënë mbrëmjen e së mërkurës nga Shtëpia e Bardhë, pas një dite bisedimesh që Trump i cilësoi si “shumë produktive”.
Sipas burimeve të New York Times, një takim personal me Putinin mund të ndodhë javën e ardhshme, i pasuar nga një samit trepalësh. Megjithatë, detaje të mëtejshme nuk janë bërë publike, dhe ende nuk ka konfirmim zyrtar nga Kievi apo Moska.
Trump ka dërguar përfaqësuesin e tij Steve Witkoff në Moskë, ku u takua me Putinin në Kremlin. Pamjet e publikuara treguan një atmosferë miqësore mes tyre. Kremlini konfirmoi se u shkëmbyen “sinjale konstruktive”, pa dhënë detaje të qarta.
Afati i vendosur nga Trump për një marrëveshje armëpushimi – deri të premten – është ende në fuqi. Në të kundërt, ai ka kërcënuar me sanksione të reja ndaj Rusisë dhe partnerëve të saj tregtarë. Menjëherë pas vizitës së Witkoff në Moskë, Trump nënshkroi një urdhër për tarifë shtesë 25% ndaj Indisë, duke e akuzuar për mbështetje indirekte të luftës përmes blerjes së naftës ruse.
Presidenti ukrainas konfirmoi se ka folur me Trump pas vizitës së Witkoff dhe ka qenë në kontakt edhe me udhëheqës evropianë. Ai u shpreh skeptik për vullnetin e Rusisë për paqe, duke deklaruar se “hapat seriozë do të ndërmerren vetëm kur Moska të mbetet pa para”.
