Komisioni Pan-Europian për Klimën dhe Shëndetin ka publikuar një letër të hapur për 53 shtetet anëtare të rajonit europian të OBSH-së, ku theksohet se ndryshimet klimatike janë një kërcënim i afërt. Në letër theksohet se vdekshmëria prej valës së të nxehtit gjatë 20 viteve u rrit me 30%, ndërsa gjatë vitit 2022-2023 janë shënuar 100 mijë humbje jete në 35 vende europiane.
Komisioni Pan-Europian ka ngritur alarmin për rritjen e numrit të vdekshmërisë në vitet që vijnë, ndërsa thekson gjithashtu se ndryshimet e klimës po nxisin ndër të tjera edhe përhapjen e sëmundjeve që kanë qenë të rralla në rajon.
“Vdekshmëria e lidhur me nxehtësinë është rritur me 30% në dy dekadat e fundit, me më shumë se 100 000 vdekje të regjistruara në 35 vende evropiane në vitet 2022 dhe 2023 së bashku. Ky numër vdekjesh pritet të rritet në vitet në vijim. Qershori 2025 ishte muaji më i nxehtë i regjistruar ndonjëherë në Evropën Perëndimore, me dy valë të rënda të nxehtësisë para se vera të arrinte kulmin. Ndërkohë, ndryshimi i klimës po nxit përhapjen e sëmundjeve dikur të rralla në Rajon – rastet e dengues së transmetuar lokalisht në Bashkimin Evropian/Zonën Ekonomike Evropiane u rritën me 368% midis viteve 2022 dhe 2024”, thuhet në letër.
Komisioni ka bërë thirrje urgjente për përgatitje më të mirë në të gjitha nivelet e sistemit shëndetësor dhe në të gjithë sektorët, pasi sikurse theksohet në letër, spitalet janë ato që po ‘goditen’ nga nxehtësia. Sipas komisionit Pan-Europian, edhe punonjësit e shëndetësisë janë në rrezik lodhje, duke e lidhur këtë fakt jo vetëm me valën e të nxehtit e ngarkesës në spitale, por edhe me pamjaftueshmërinë e teknologjisë së informacionit.
“Spitalet po e ndiejnë nxehtësinë. Departamentet e urgjencës përballen me një rritje të pranimeve gjatë valëve të të nxehtit, veçanërisht për sëmundjet e zemrës, mushkërive dhe veshkave. Shëndeti mendor vuan gjithashtu: gjumi përkeqësohet, ankthi thellohet dhe funksioni njohës bie. Ndërkohë, njerëzit me probleme të shëndetit mendor përballen me rreziqe më të larta të goditjes nga nxehtësia dhe shtrimit në spital, pasi disa ilaçe me recetë zvogëlojnë aftësinë e trupit për të rregulluar temperaturën e tij. Për më tepër, punonjësit e shëndetësisë janë në rrezik të lodhjes nga nxehtësia dhe lodhjes, ndërsa sistemet në të cilat mbështeten – nga ftohja te teknologjia e informacionit – përkulen nën presion”, thuhet më tej në letër.
