Muzeu Historik i Shkodrës u mbush mbrëmë me tingujt e veçantë të koncertit të radhës të “Shkodra Jazz Festival”, duke sjellë një atmosferë të ngrohtë dhe plot emocion për publikun.
Nën udhëheqjen e Paçalin Pavacit dhe Brixhilda Martinit, të rinjtë e “Rrok Academy” u ngjitën në skenë me klasat “Classic” dhe “Junior”, duke dëshmuar rritjen dhe pasionin e brezit të ri për muzikën.
Drejtuesit e Akademisë theksuan rëndësinë e aktiviteteve të tilla për edukimin artistik të të rinjve dhe për pasurimin e jetës kulturore të qytetit.
“Këtë radhë kemi veç repertor të huaj. Në datën 18, kur luajta me miqtë e mi, përdorëm edhe pjesë shqiptare, por këtë radhë luajmë vetë pjesë të huaja nga Brahms, Bartok, Briten, që janë të mira si për studimin për të rinjtë, ashtu edhe për publikun, duke qenë se është koncert i jashtëm,” thotë drejtuesi i “Rrok Academy Classic”, z. Pavaci.
“Këtë herë kemi studentë më të vegjël se viti i shkuar. Kjo më gëzon më shumë, sepse ata shohin studentët e rritur, të ‘Academy Classic’, domethënë shohin tri etapa të ndryshme të punës,” shprehet drejtuesja e “Rrok Academy Junior”, znj. Martini.
Edicioni i 16-të i Shkodra Jazz Festival do të vijojë me net të tjera muzikore sërish në mjediset e Muzeut Historik të Shkodrës dhe sheshit para Bashkisë.
