Këtë 27 gusht mbushen katër vite pa dirigjentin dhe muzikantin e njohur Kujtim Alia.
Në këtë përvjetor, bashkëpunëtorët e tij kujtojnë figurën dhe gjurmët që la pas. Drejtoresha e Qendrës Kulturore të Fëmijëve “Kujtim Alija”, Orjeta Kelaj, vë në dukje rolin e tij në edukimin e brezave të rinj.
“Dashamirësia e tij, puna e tij, profesionalizmi, por mbi të gjitha njerëzorja që mësues Kujtimi ka pasur… sepse gjithmonë kanë folur sytë e mësues Kujtimit. Unë jam sot në pozicionin e mësueses dhe mundohem që me fëmijët më të cilët ne punojmë, të lëmë ato këshilla që dikur na i ka lënë mësues Kujtimi,” tha znj. Kelaj.
Dirigjenti Ermir Zoga ndan kujtimin e orëve të fundit të jetës së mjeshtrit.
“Unë kam një kujtim përfundimtar prej tij, një mesazh dy ditë para se ai të vdiste. Më erdhi rreth 2:30 të natës. Sapo kishim kryer Festivalin e 59-të. Kishte ndërtuar platformën e festivalit të 60-të. Me thoshte mes te tjerave ‘ma bëni hallall, por unë kështu jam, kështu që po ju lë’, sepse si duket e ndjente se nuk ishte në terezi,” kujton dirigjenti Zoga.
Kujtim Alia ishte themelues i konkursit “Bilbilat e vegjël të Shkodrës këndojnë” dhe udhëhoqi festivale kombëtare e mbarëkombëtare për fëmijë.
Nën drejtimin e tij, Banda Frymore e Shkodrës fitoi çmime të para në Shqipëri dhe Itali.
Për gjithë kontributin e dhënë u dekorua me Urdhrin “Naim Frashëri” dhe titullin “Mirënjohja e Qytetit”. Ai la pas një trashëgimi të çmuar kulturore.
RTSH
