Kryetari i porsazgjedhur i Kuvendit të Kosovës, Dimal Basha, e ka distancuar sërish veten nga një artikull që flet për ish-Ushtrinë Çlirimtare të Kosovës (UÇK).
Në punimin ku ai është bashkautor, thuhet se “sipas rasteve të hetuara, fondet për UÇK-në erdhën nga shqiptarë të zakonshëm në diasporë, por edhe nga trafikantët e drogës që operonin në gjithë Evropën Perëndimore dhe në Shtetet e Bashkuara”.
Basha tha se “distancohem nga të gjithë ata që kanë shkruar kundër kësaj vlere”.
“Dua të deklaroj me përgjegjësinë më të madhe qytetare dhe kombëtare që kurrë në jetën time nuk është shkruar dhe nuk do të gjendet asnjë përmbajtje që bie ndesh me vlerën e shenjtë të popullit tonë”, tha Basha.
Një ditë më parë, ai kishte thënë në Facebook se kontributi i tij në këtë punim ishte vetëm në Kapitullin 3, “i cili trajton depërtimin e Islamit fundamentalist në Evropën Juglindore, me fokus Kosovën”.
Ndërkohë, Basha tha se Kuvendi do t’i vazhdojë punimet me shortin për kandidatët për nënkryetarin serb të Kuvendit.
Basha bëri thirrje që deputetët ta votojnë Nenad Rashiçin për nënkryetar të Kuvendit nga pakica serbe.
“Mendoj se është akt patriotik ta votojmë sot dhe në kryesi të Kuvendit ta kemi një nënkryetar që e njeh Republikën e Kosovës dhe punon për interesat e saj”, tha Basha.
Gjatë vazhdimit të seancës konstituive të martën, Rashiç ishte hedhur në votim me short, por nuk arriti t’i merrte votat e mjaftueshme për t’u zgjedhur.
“Siç e dini që Rashiçi është hedhur në votim vetëm një herë, Gjykata Kushtetuese ka thënë që një kandidat mund të kandidohet deri në tri herë. Pra, janë edhe dy hera që ai të votohet”, shtoi Basha.
Rashiç është kryetar i partisë serbe për Liri, Drejtësi dhe Mbijetesë, dhe njëri i afërt me kreun e Lëvizjes Vetëvendosjes dhe kryeministrin në detyrë, Albin Kurti./REL
