Nxënësit me aftësi të kufizuara në institucionet publike të arsimit parauniversitar marrin mbështetje të specializuar përmes mësuesve ndihmës, sipas udhëzimit nr. 26, datë 25.11.2019 të Ministrisë së Arsimit, i cili përcakton qartë rolin, detyrat dhe kriteret e përzgjedhjes së këtij profesioni të rëndësishëm për arsimin gjithëpërfshirës.
Me shtesën e re, është miratuar pika 4.1, e cila i jep më shumë fleksibilitet sistemit në menaxhimin e ngarkesës së mësuesve ndihmës.
Sipas ndryshimit, në raste të veçanta, bazuar në vlerësimin e ngarkesës mësimore dhe me miratimin e Agjencisë Kombëtare të Arsimit Parauniversitar, një mësues ndihmës mund të punojë edhe me deri në dy nxënës me aftësi të kufizuara, duke marrë parasysh nivelin e vështirësisë së tyre dhe nevojën për mbështetje të veçantë.
Sipas udhëzimit, mësuesi ndihmës duhet të jetë i licencuar në arsim special ose të ketë përfunduar studime të ciklit të dytë në edukim të shoqëruara me trajnime për fëmijët me aftësi të kufizuara. Në raste të veçanta, ai mund të punojë me 2 deri në 3 nxënës në të njëjtin institucion, ndërsa orët caktohen nga drejtoria dhe komisionet shumëdisiplinare të shkollës.
Detyra kryesore e mësuesit ndihmës është të ndihmojë në zhvillimin akademik, social dhe emocional të nxënësit, duke u bërë pjesë e hartimit dhe zbatimit të Programit Edukativ Individual (PEI) në bashkëpunim me mësuesin e klasës, psikologun, punonjësin social dhe prindërit. Ai asiston gjatë mësimit, ndihmon në përfshirjen në aktivitete, si dhe promovon kalimin nga varësia drejt pavarësisë.
Një tjetër aspekt i rëndësishëm është bashkëpunimi me prindërit, të cilët informohen rregullisht mbi progresin e fëmijës dhe orientohen drejt shërbimeve të specializuara në shkollë apo komunitet. Po ashtu, mësuesi ndihmës mban përgjegjësi për ruajtjen e konfidencialitetit të të dhënave të nxënësit dhe merr pjesë në trajnime profesionale të vazhdueshme.
