Me kërkesë të një të katërtës së anëtarëve është mbledhur Komisioni për Çështjet Europiane nën drejtimin e nënkryetares socialiste. Mbledhje e thirrur në 10-ditëshin e fundit të mandatit kësaj legjislature.
“Komisionet e përhershme mund të mblidhen si në kohën kur kuvendi është i mbledhur në sesion, ashtu edhe jashtë tij. kur mbledhja e komisionit të përhershëm nuk thirret nga kryetari i komisionit, atëherë ajo mund të thirret me kërkesë të një të katërtës së anëtarëve të komisionit”, tha Etilda Gjonaj.
Opozita që ka drejtimin e këtij komisioni nuk u bë pjesë e mbledhjes, ndërkohë arsyeja që e shtyjnë mazhorancën ta thërrasë atë është procesi i negociatave. Është miratuar mbajtja në mesin e muajit shtator e konferencës ndërqeveritare me BE, ndaj është detyrim që parlamenti të shqyrtojë projekt pozicionin negociues për grupkapitullin e V-të “Burimet, bujqësia dhe kohezioni”.
“Me këtë grupkapitull, Shqipëria e përmbyll fazën e çeljes së negociatave dhe kalon gradualisht në fazën e mbylljes së negociatave”, tha Majlinda Dhuka.
Grupkapitulli V përbëhet nga 5 kapituj: Kapitulli i Bujqësisë dhe Zhvillimi Rural, Kapitulli për Sigurinë Ushqimore, Politika Veterinare dhe Fitosanitare, Peshkimi, Politika Rajonale dhe Koordinimi i Instrumenteve Strukturore, si dhe Kapitulli Dispozitat financiare dhe buxhetore.
Kur na ndan vetëm pak ditë nga nisja e sesionit të ri parlamentar pas zgjedhjeve të përgjithshme të mbajtura më 11 maj 2025, këtë të premte është mbledhur Kuvendi i vjetër.
Komisioni për Çështjet Europiane nën drejtimin e zv/kryetares Etilda Gjonaj është mbledhur prej orës 11:00 në sallën “Pjetër Arbnori” të Kuvendit dhe të pranishëm janë vetëm ligjvënësit socialistë.
Opozita nuk është e pranishme në mbledhjen, ku do të shqyrtohet projekt pozicioni negociues për Grupkapitullin e V-të “Burimet, bujqësia dhe kohezioni” për negociatat për anëtarësimin në Bashkimin Evropian.
Deputetja demokrate, Jorida Tabaku, e cila e drejtoi këtë komision në legjislaturën që po mbyllet, ka reaguar përmes rrjeteve sociale, duke e cilësuar mbledhjen e kësaj të premteje nën drejtimin e zv/kryetares Etilda Gjonaj, si antikushtetuese.
“I sqarova qeverise qe mbledhja e komisionit jashtë sesioni është antikushtetuese! Për një jave fillon sesioni ri parlamentar dhe opozita e ka prioritet procesin e integrimit dhe do te beje çdo gjë ne dore te saj ashtu si ka bere ne çdo rast për këtë proces! Ofrova disa zgjidhje praktike si mund ta kalonim këtë ngërç por qeveria vazhdoi ne mënyre te njëanshme!”, shprehet Tabaku.
Më tej ajo nënvizon se “asnjë nga deputetët që sot kanë thirrur mbledhjen nuk janë të rizgjedhur dhe nuk e kanë legjitimitetin të thërrasin mbledhje jashtë sesioni”.
Të pranishëm në komision:
Majlindja Dhuka – Ministër Shteti dhe Kryenegociator;
Adea Pirdeni – Ministër i Shtetit për Administratën Publike dhe Antikorrupsionin;
Arbjan Mazniku – Ministër i Shtetit për Pushtetin Vendor;
Arjan Jaupllari – Zëvendësministër në Ministrinë e Bujqësisë dhe Zhvillimit Rural;
Roland Kristo
Erjona Çela – Zv.ministre e Financave
Elona Ajazi
Irfan Tarelli – MBZHR
Luljeta Çuko
Arjana Dyrmishi
Aldo Mekoçi – Këshlltar i ministrit të shtetit për Pushtetin Vendor, Arbjan Mazniku
