Kryeparlamentarja Elisa Spiropali ka njoftuar se në mbledhjen e sotme, 29 gusht, të Komisionit për Çështjet Europiane, Kuvendi i Shqipërisë shqyrtoi draftpozicionin negociues për Grupkapitullin V “Burimet, bujqësia dhe kohezioni”.
Në këtë mbledhje, sipas kryetares së Kuvendit, përfundoi shqyrtimi i pozicioneve negociuese për gjashtë grupkapitujt kryesorë:
–Themelorët
–Tregu i brendshëm
–Konkurrueshmëria dhe rritja gjithëpërfshirëse
–Agjenda e gjelbër dhe ndërlidhja e qëndrueshme
–Burimet, bujqësia dhe kohezioni
–Marrëdhëniet me jashtë
Pozicionet e miratuara i janë dërguar Këshillit të Ministrave për miratim, ndërsa dy konferenca ndërqeveritare BE-Shqipëri priten shumë shpejt.
Hapja e negociatave për grupkapitujt IV dhe V do të shënojë fillimin e negociatave për të gjithë grupkapitujt, një hap ky i rëndësishëm drejt integrimit të Shqipërisë në Bashkimin Europian.
Siç thekson Spiropali, “anëtarësimi i Shqipërisë në BE mbetet kryefjala e Legjislaturës XI dhe e Kuvendit të ri, duke konfirmuar angazhimin e plotë të Parlamentit për realizimin e këtij objektivi strategjik”.
Kujtojmë se Komisioni për Çështjet Europiane u drejtua sot nga nënkryetarja socialiste, Etilda Gjonaj, ndërkohë që opozita nuk mori pjesë në mbledhje.
Kryenegociatorja Majlinda Dhuka tha se “në 10 muajt e fundit, Shqipëria ka arritur të zhvillojë me BE-në 4 konferenca ndërqeveritare dhe të çelë 24 kapituj e 3 kritere“.
