Nga Bujar Leskaj
Siç ndodh në çdo periudhë rreshjesh, situata në Vlorë vazhdon të përsëritet, me bllokim të rrugëve, kanalizime të mbingarkuara dhe një hidrovor që nuk punon në kapacitetin e tij të plotë. Institucionet nuk po marrin asnjë përgjegjësi dhe qyteti vazhdon të vuajë nën pushtetin e ujit dhe përmbytjeve.
Edhe pse kjo situatë është bërë një problem i përsëritur, nuk janë ndërmarrë ende masa parandaluese për ta menaxhuar. Njoftimet që shpërndahen 24 orë përpara kushteve të paralajmëruara meteorologjike janë një reagim tepër i vonuar dhe pa efekt. Kjo është një dështim i dukshëm i institucioneve dhe e papranueshme që kjo situatë të përsëritet pas çdo shiu.
Pavarësisht që ndodhemi ende në sezonin turistik, pamjet që ofron Vlora në këto momente janë të papranueshme për çdo vizitor, qoftë vendas apo të huaj. Bllokimi i rrugëve për shkak të kanalizimeve të bllokuara ka paralizuar qarkullimin në qytet, ndërsa përmbytjet kanë shkaktuar dëme të shumta materiale në banesa dhe biznese.
Apelojmë për një reagim të shpejtë dhe të koordinuar nga autoritetet për të pastruar zonat më të prekura dhe për të monitoruar situatën në kohë reale. Duhet të jenë më pranë qytetarëve dhe të ofrojnë ndihmë të menjëhershme për ata që janë prekur nga kjo situatë.
