Shoqata e Siguruesve të Shqipërisë ka reaguar ndaj projektligjit të shpallur për konsultim publik nga Ministria e Financave, i cili synon të bëjë të detyrueshëm sigurimin e banesave të qytetarëve nga rreziku i tërmetit.
Në një qëndrim zyrtar, Shoqata vlerëson nismën e qeverisë, duke e cilësuar atë një hap të rëndësishëm për forcimin e mbrojtjes financiare të qytetarëve, veçanërisht në një vend si Shqipëria, i klasifikuar nga industria globale e sigurimeve si “zonë e kuqe” për rrezikshmërinë e lartë nga katastrofat natyrore (NatCat), përfshirë tërmetet dhe përmbytjet.
Përvoja e 2019-ës, test i kapaciteteve financiare
Sipas të dhënave të Shoqatës, gjatë tërmeteve të vitit 2019, shoqëritë e sigurimeve dhe partnerët e tyre ndërkombëtarë paguan në kohë rekord rreth 40 milionë euro dëme. Ky fakt, sipas saj, është tregues i qëndrueshmërisë financiare të tregut dhe i partneriteteve të konsoliduara me risiguruesit ndërkombëtarë.
Aktualisht, sigurimi i banesave dhe bizneseve në Shqipëri ka një mbulim prej rreth 250 milionë euro, shifër që konsiderohet e rëndësishme, por ende e shpërndarë në mënyrë të kufizuar, pasi prek vetëm objektet e siguruara.
Sfida e skemës së propozuar
Shoqata nënvizon se projektligji në formën e paraqitur aktualisht, ndonëse e bën të detyrueshëm sigurimin e pronës, krijon një sërë problematikash praktike që lidhen me funksionimin e tregut të sigurimeve. “Ka elementë që kërkojnë diskutim të mëtejshëm, sidomos në raport me katastrofat natyrore si tërmetet, përmbytjet dhe zjarret”, theksohet në reagim.
Një nga pikat që vlerësohet pozitivisht është përcaktimi i mbështetjes financiare nga shteti për shtresat në nevojë, duke siguruar që sigurimi i banesave të mos shndërrohet në një barrë të papërballueshme.
Thirrje për bashkëpunim institucional
Shoqata e Siguruesve apelon për një proces të gjerë konsultimi mes institucioneve shtetërore dhe industrisë së sigurimeve, me synim ndërtimin e një skeme funksionale dhe të qëndrueshme, që të garantojë mbrojtjen e qytetarëve dhe të ulë barrën mbi buxhetin publik në rast katastrofash natyrore.
“Ne jemi të gatshëm të kontribuojmë me ekspertizën tonë dhe me propozime të hartuara në bashkëpunim me Shoqatën Evropiane të Siguruesve dhe partnerët ndërkombëtarë”, deklaron Shoqata, duke shpresuar që sugjerimet e saj të merren në konsideratë gjatë procesit të rishikimit të projektligjit. /ekofin.a
