“Mendoj se pikat më të larta janë ato ku munda të bëj një film që më thanë se nuk mund ta bëja. All The President’s Men ishte njëri prej tyre, The Candidate, Quiz Show, Ordinary People dhe A River Runs Through It, kështu që mendoj se është një lloj kolektivi. Filmat që kam realizuar, ndoshta ata që i vlerësoj më shumë, janë ata që më thanë se nuk do të bëheshin kurrë, por që, falë këmbënguljes, u realizuan”.
Bota e kinemasë humbi një nga emrat më të mëdhenj. Aktori, regjisori dhe producenti legjendar Robert Redford ndërroi jetë në moshën 89-vjeçare.
Robert Redford u shua në shtëpinë e tij në Utah. Lajmi u bë i ditur nga publicistja e aktorit, e cila nuk dha një shkak për vdekjen.
I lindur në vitin 1936 në Kaliforni, Redford u bë simbol i Hollivudit në vitet ’70 e ’80, duke fituar zemrat e publikut me interpretimet e tij karizmatike. Redford ishte një nga aktorët e preferuar për dekada të tëra, qoftë në komedi, drama apo trillera.
Si aktor, filmat e tij më të mëdhenj përfshinin Butch Cassidy and the Sundance Kid, All the President’s Men dhe The Sting.
Robert Redford nisi të merrej me regji në të 40-at dhe fitoi një çmim Oscar për filmin e tij të parë Ordinary People, që fliste për shpërbërjen e një familjeje të klasës së mesme pas vdekjes së një djali. Filmi fitoi tre çmime të tjera Oscar, përfshirë atë për filmin më të mirë. Redford zakonisht kërkonte që filmat e tij të mbanin peshë kulturore dhe nuk e preferonte jetën hollivudiane.
Gjatë gjithë karrierës së tij, Redford fitoi shumë çmime prestigjioze. Një ndër to ishte edhe Medalja Presidenciale e Lirisë në vitin 2016, e cila iu dha nga ish-presidenti i SHBA-së, Barack Obama.
Redford themeloi Festivalin e Filmit Sundance, i cili u bë trampolina kryesore për kinemanë dhe për shumë regjisorë të rinj.
Për tre dekada, Redford ishte gjithashtu administrator i Këshillit të Mbrojtjes së Burimeve Natyrore. Ai ishte aktivist i zjarrtë i kauzave mjedisore.
Buzëqeshja e tij, flokët e çrregullt bjondë dhe pamja krejtësisht amerikane ishin mjaft tërheqëse për publikun. Redford shihej edhe si simbol seksi.
Robert Redford lë pas gruan e tij, Sibylle Szaggars, me të cilën u martua në vitin 2009. Ai kishte qenë më parë i martuar me Lola Van Wagenen; çifti kishte katër fëmijë para se të divorcohej. Dy nga fëmijët e tij ndërruan jetë në moshë shumë të re.
Ai la pas dy vajza, Shauna-n dhe Amy-n.
Yjet e Hollivudit, si Leonardo DiCaprio e shumë të tjerë, reflektuan mbi vdekjen e aktorit dhe thanë se ishte një humbje e madhe.
“Së pari, është një humbje e madhe. Ai ishte një aktor i jashtëzakonshëm. Ai bëri Three Days of the Condor, All the President’s Men. Ai ishte një regjisor dhe aktor i jashtëzakonshëm. Por më shumë se çdo gjë tjetër, ai ishte një ambientalist i zjarrtë. Dua të them, ai ishte një hero për shumë njerëz në industrinë tonë, përfshirë edhe mua”, tha aktori Leonardo DiCaprio.
Regjisorja Allison Anders theksoi ndikimin e thellë që Redford kishte lënë në botën e kinemasë.
Ai e përdori famën dhe pasurinë për t’u shërbyer të tjerëve, theksoi ajo.
“Humbja e Robert Redford më bën të kuptoj se sa shumë kishim. E dini, kjo është gjëja e jashtëzakonshme – se sa shumë i dha ai filmit të pavarur. Në një farë mënyre, ai e përcaktoi vërtet filmin e pavarur, në kuptimin që e përcaktoi atë si një koleksion zërash, zërash të pavarur dhe vizioni personal”, u shpreh regjisorja.
Anders tha se kishte një pikëpamje të ndryshme nga shumë kolegë të tij të famshëm në Hollivud.
“Mendova: kaq ishte. Ky është fundi i filmit të pavarur siç e njihnim ne. Por pastaj thashë: jo. Ai na mësoi si ta vazhdonim. Ia kemi borxh atij ta vazhdojmë. Duhet ta vazhdojmë këtë gjë. Nuk do të thotë domosdoshmërisht që unë mund të bëj filma që të bëhen, por sigurisht që mund t’u mësoj njerëzve si t’i shkruajnë ato, si të gjejnë zërin e tyre për ta bërë këtë. Mund t’u mësoj atyre si të flasin me aktorët. Mund ta vazhdoj këtë”, shtoi ajo.
Robert Redford ka lënë gjurmë në kinemanë botërore dhe do të jetë një figurë e pavdekshme për kontributin e tij.
