Tre shkencëtarët Mary Brunkow, Fred Ramsdell dhe Shimon Sakaguchi kanë fituar Çmimin Nobel për Fiziologji ose Mjekësi për vitin 2025, për “zbulimet e tyre në lidhje me tolerancën imunitare periferike”.
Në një deklaratë u tha se zbulimet e tyre kanë hedhur themelet për një fushë të re kërkimore dhe kanë nxitur zhvillimin e trajtimeve të reja, si për kancerin apo sëmundje autoimune.
Fituesit për mjekësi zgjidhen nga Asambleja e Nobelit e universitetit mjekësor të Institutit Karolinska të Suedisë dhe marrin një shumë çmimi prej 11 milionë kronash suedeze (1.2 milionë dollarë), si dhe një medalje ari të dhënë nga mbreti i Suedisë.
Çmimet Nobel u krijuan sipas testamentit të Alfred Nobel, shpikësit suedez të dinamitit dhe një biznesmeni të pasur. Ato jepen që nga viti 1901 për kontribute të shquara në shkencë, letërsi dhe paqe, me ndërprerje kryesisht gjatë Luftërave Botërore.
