Dy ministre belge, me mision në Tiranë dhe Prishtinë
Dy ministrat, të Drejtësisë dhe të Azilit e Migracionit në Belgjikë, nisën këtë të hënë një mision diplomatik në Shqipëri dhe Kosovë.
Lajmi bëhet i ditur nga mediat belge, të cilat nënvizojnë se vizitat e ministres së Drejtësisë, Annelies Verlinden, dhe asaj të Azilit dhe Migracionit, Anneleen Van Bossuyt, do të përqendrohen në adresimin e mbipopullimit të burgjeve dhe luftën kundër krimit të organizuar.
Zgjidhjet e mundshme që do të propozohen nga përfaqësuesit e qeverisë belge janë marrja ose ndërtimi i një burgu jashtë vendit për jo-rezidentët, potencialisht në Kosovë ose Shqipëri, si dhe dërgimi i të burgosurve shqiptarë drejt vendit tonë.
Mediat belge raportojnë se në burgjet e tyre ndodhen 307 shqiptarë, 253 prej të cilëve nuk kanë të drejtë qëndrimi në vend.
Temë e këtyre takimeve është gjithashtu edhe arritja e një marrëveshjeje me Shqipërinë dhe Kosovën për ndarjen e aseteve të krimit të organizuar të sekuestruara, që një pjesë e tyre t’i kalojë Belgjikës.
Në Shqipëri, këto takime, sipas burimeve të TV Klan, do të mbahen ditën e martë dhe të mërkurë në Ministrinë e Drejtësisë, Ministrinë e Brendshme dhe në SPAK.
