Prej fillimit të vitit 2025, çdo qytetar që plotëson kriteret ligjore mund të bëhet pjesë e Forcës Rezerviste në Shqipëri, një strukturë e re që synon të përbëjë 20% të forcës aktive të ushtrisë në vitet e ardhshme.
Ligji për krijimin e kësaj force u votua më 19 dhjetor 2024 dhe tashmë ka hyrë në fuqi, duke parashikuar një personel prej rreth 2.100 rezervistësh.
Në një intervistë për RTSH 24, Kolonel Dritor Papa theksoi rëndësinë e kësaj nisme për fleksibilitetin operacional të Forcave të Armatosura.
“Ky shërbim do të ofrojë një fleksibilitet operacional, duke mundësuar mobilizim të shpejtë gjatë krizave ose emergjencave. Gjatë vitit 2025, është planifikuar që 125 ushtarakë të parë të shërbimit rezervist të integrohen në strukturën aktive të FA, ndërsa në vitin pasardhës numri pritet të rritet në 250, me tendencë rritjeje të vazhdueshme. Sipas planit Afatgjatë të Zhvillimit të FA është parashikuar që numri i personelit rezervistë do të jetë rreth 2100 vetë ” u shpreh Papa.
Duke reflektuar mbi ndryshimet mes realitetit të viteve ’90 dhe sot, Kolonel Papa tha: “Pas Luftës së Dytë Botërore, Shqipëria ka qenë një nga shoqëritë më të militarizuara në botë. Promovohej ushtria e popullit-ushtar, ku popullsia ishte e përgatitur për mbrojtjen e vendit nga agresionet. Sot mbrojtja e Shqipërisë është e lidhur ngushtë me NATO-n.”
Ai theksoi se rikthimi i shërbimit të detyrueshëm ushtarak nuk ka si qëllim thjesht shtimin e numrit të trupave, por ndërtimin e një force moderne dhe teknologjikisht të zhvilluar.
“Qëllimi është kompletimi i strukturës së shërbimit ushtarak në rezervë të Forcave të Armatosura të Republikës së Shqipërisë, duke garantuar nivelin e gatishmërisë dhe duke synuar rritjen e kapaciteteve të mbrojtjes për të përmbushur me sukses operacionet në të cilat kjo forcë përfshihet, si dhe të rregullojë të drejtat, detyrimet dhe përgjegjësitë e shtetasve, të organeve shtetërore e subjekteve private për rekrutimin dhe shërbimin në forcën rezerviste.Qasja është që duhet të kemi forca të modernizuara dhe të zhvilluara nga ana teknologjike për të bërë të mundur realizimin e misionit pa pasur nevojë për kapacitet të madh forcash.”
Papa shtoi se vendimi për rikthimin e shërbimit ushtarak aktiv do të paraprihet nga një analizë e thellë dhe gjithëpërfshirëse, duke marrë në konsideratë zhvillimet teknologjike dhe inovacionin.
Në lidhje me ndikimin tek të rinjtë, ai tha se “Kjo do të ketë aspekte pozitive tek rinia, tek forcimi i karakterit dhe të rritjes së ndjenjës së atdhedashurisë.”
Ai theksoi se rezervistët do të luajnë një rol të rëndësishëm në përballimin e sfidave të çdo natyre.
“Forcat e shërbimit ushtarak në rezervë duhet të konsiderohen si një pjesë e vlefshme dhe e çmuar e Forcave tona të Armatosura. Do të luajnë një rol të rëndësishëm, praktik e konkret në përballimin e sfidave të çdo natyre e lloji.”
/rsh.al/
