Presidenti i Republikës, Bajram Begaj, priti këtë të mërkurë, 15 tetor, në një takim pune Bordin Drejtues të Fondacionit Shqiptaro-Amerikan të Zhvillimit, (AADF).
Kreu i shtetit u shprehu anëtarëve të Bordit vlerësimin e tij për kontributin e AADF-së në mënyrë të qëndrueshme dhe afatgjatë në zhvillimin e Shqipërisë.
Begaj vlerësoi në mënyrë të veçantë se investimet e Fondacionit kanë qenë një shembull suksesi dhe partneriteti afatgjatë mes Shqipërisë dhe Shteteve të Bashkuara të Amerikës në fushat ku vendi ka pasur më shumë nevojë, si: në arsim, kulturë, turizëm sistemin bankar, sigurimet dhe infrastrukturë.
Kreu i shtetit përgëzoi, gjithashtu, programet e fundit të AADF-së që synojnë forcimin e kapitalit njerëzor përmes bursave, praktikave profesionale dhe nismave në fushën e inteligjencës artificiale për të rinjtë shqiptarë. Po ashtu, Presidenti Begaj nënvizoi rëndësinë e këtyre projekteve për të zvogëluar ikjen e trurit, për të përfshirë Diasporën akademike dhe për të ndërkombëtarizuar kërkimin shkencor në Shqipëri.
Duke ndalur te bashkëpunimi në fushën e sigurisë kibernetike, Kreu i Shtetit përmendi marrëveshjen mes AADF-së, Autoritetit Kombëtar për Sigurinë Kibernetike dhe Protik Innovation Center, si një nismë që ndihmon ndjeshëm në forcimin e kapaciteteve profesionale dhe mbrojtjen e infrastrukturës digjitale kombëtare.
“Shqipëria ka përfituar ndjeshëm nga përvoja, vizioni dhe partneriteti juaj”, u shpreh Presidenti Begaj, duke shtuar se “AADF është një model se si bashkëpunimi mes dy kombeve mike, Shqipërisë dhe Shteteve të Bashkuara, mund të prodhojë zhvillim të qëndrueshëm dhe inovativ.”
