Përfaqësuesi dhe ambasadori i Shteteve të Bashkuara në Kombet e Bashkuara, Jeff Bartos, deklaroi sot në seancën e Këshillit të Sigurimit të OKB-së se ka ardhur koha që misioni i UNMIK-ut (Misioni i Kombeve të Bashkuara në Kosovë) të tërhiqet nga Kosova.
Ai argumentoi se situata e sigurisë në vend nuk e justifikon më praninë e këtij misioni.
“Nuk ka krizë sigurie në Kosovë dhe UNMIK-u nuk ka rol në qeverisjen e Kosovës. Koha ka ardhur të tërhiqet misioni. Ne çmojmë përpjekjet e UNMIK-ut për dialog. Realiteti është se UNMIK-u është një mision paqeruajtës, pa paqeruajtës që punojnë në funksione që duhet të kryhen nga organizata të tjera,” tha Bartos gjatë fjalës së tij në Këshillin e Sigurimit.
Sipas Bartos, përgjegjësitë e UNMIK-ut mund të transferohen te organizata të tjera ndërkombëtare ose institucionet vendore të Kosovës, të cilat tashmë kanë kapacitete të mjaftueshme për të menaxhuar çështjet e brendshme.
Bartos ka nënvizuar gjithashtu qëndrimin e Shteteve të Bashkuara për nevojën e vazhdimit të dialogut mes Kosovës dhe Serbisë, duke u bërë thirrje të dyja palëve të shmangin veprimet që mund të çojnë në përshkallëzim të tensioneve.
“SHBA-ja nxit Kosovën dhe Serbinë të përmbahen nga masat eskaluese dhe të ndërtojnë paqen dhe stabilitetin me njohjen si qëllim përfundimtar,” tha ai, duke ripohuar mbështetjen e Uashingtonit për një zgjidhje përfundimtare që çon drejt normalizimit të marrëdhënieve mes dy vendeve.
UNMIK-u u themelua në vitin 1999 pas përfundimit të luftës në Kosovë, me Rezolutën 1244 të Këshillit të Sigurimit të OKB-së, për të administruar territorin dhe për të mbështetur ndërtimin e institucioneve demokratike.
Pas shpalljes së pavarësisë së Kosovës në vitin 2008 dhe forcimit të institucioneve vendore, roli i UNMIK-ut është zvogëluar ndjeshëm, duke u fokusuar kryesisht në lehtësimin e dialogut dhe monitorimin e situatës.
