Një ngjarje e rëndë raportohet sot nga Elbasani, ku një 22-vjeçar humbi jetën tri ditë pas një aksidenti rrugor.
Viktima quhet Klaus Veliaj, 22 vjeç nga Elbasani.
Aksidenti ndodhi fundjavën e kaluar në fshatin Letan, në njësinë administrative Bradashesh, ku motomjeti që ai drejtonte u përplas me një automjet bujqësor.
Për pasojë, mbetën të plagosur edhe drejtuesi i mjetit bujqësor dhe një person tjetër, të cilët ndodhen jashtë rrezikut për jetën.
Ndërkohë, i riu Veliaj, që punonte në sektorin privat në një njësi shërbimi në qytetin e Elbasanit, pësoi dëmtime të rënda dhe u dërgua me urgjencë në Spitalin e Traumës në Tiranë.
Pavarësisht përpjekjeve të mjekëve, 22-vjeçari nuk mundi t’u mbijetojë plagëve, duke ndërruar jetë tri ditë pas aksidentit tragjik.
Grupi hetimor po vazhdon hetimet për të përcaktuar shkaqet e sakta të ngjarjes.
