Pas një karriere 21-vjeçare të mbushur me çmime, trofe dhe momente të paharrueshme, David Beckham më në fund shpërblehet me një titull të lartë aristokrat, teksa ka marrë nderimin e lakmuar që i mungonte, atë të “Kalorësit”. Nga sot e më tej, ai do të thirret Sir David!
Mbreti Charles III nderoi legjendën 50-vjeçare të futbollit anglez ditën e sotme (4 nëntor), për kontributin e tij në sport dhe bamirësi, në një ceremoni në Kështjellën Windsor.
I veshur me një kostum të dizenjuar posaçërisht për këtë rast nga bashkëshortja e tij, ish-ylli i “Spice Girls”, Victoria Beckham, ish-kapiteni i Anglisë u prit nga Mbreti Charles, i cili i dha atij këtë nder, duke vulosur karrierën e tij si një nga futbollistët më të rëndësishëm të gjeneratës së tij.
Beckham shoqërohej nga prindërit e tij, Ted dhe Sandra, dhe gruaja e tij, e cila zgjodhi një fustan të zi të ngushtë të dizenjuar ekskluzivisht nga shtëpia e saj e modës. Ai dhe Victoria u martuan në vitin 1999 dhe kanë katër fëmijë së bashku, Brooklyn, Romeo, Cruz dhe Harper.
Sir Kazuo Ishiguro dhe Dame Elaine Page ishin gjithashtu midis artistëve të nderuar në të njëjtin aktivitet.
Udhëtimi i tij karrierës së tij filloi me përulësi, në oborrin e shtëpisë së tij në Leytonstone, ku i riu David do të ushtronte pafundësisht goditjet e tij të lira nën syrin vigjilent të të atit. Në vitin 1993, ai nënshkroi për Manchester United si adoleshent, duke i hapur rrugën një karriere plot sukses brenda dhe jashtë fushës.
Beckham mbetet i vetmi futbollist britanik që ka fituar tituj lige në katër vende të ndryshme. Me United, ai fitoi gjashtë tituj të Premier League, dy Kupa FA dhe ishte pjesë e tripletës historike në vitin 1999, kur skuadra e Sir Alex Ferguson mposhti Bayern Munich në finalen e Ligës së Kampionëve.
Në vitin 2003, ai u transferua te “galaktikët” e Real Madrid, së bashku me yje të tillë si Ronaldo dhe Zinedine Zidane. Edhe pse kaloi një periudhë pa fituar asnjë titull, ai më në fund fitoi La Liga në vitin 2007, pak para se të nisej për në Shtetet e Bashkuara, ku e forcoi futbollin përmes pjesëmarrjes së tij në Los Angeles Galaxy , duke fituar dhjetë trofe.
Ai e përfundoi karrierën e tij me Paris Saint-Germain në vitin 2013 , duke fituar kampionatin e Ligue 1. Ai ka luajtur 115 herë për Anglinë, 58 prej të cilave si kapiten, që nga debutimi i tij në vitin 1996 kundër Moldavisë.
Jashtë fushës, martesa e tij me stilisten e modës dhe ish-këngëtaren e Spice Girls, Victoria Beckham, në vitin 1999 e çimentoi çiftin si një nga më të njohurit në botë.
Në vitin 2024, ai u emërua ambasador për King’s Foundation, një organizatë edukative e themeluar në vitin 1990 nga vetë Charles.
