Zëvendëskryeministrja dhe Ministrja e Infrastrukturës dhe Energjisë, Belinda Balluku, është takuar në Athinë me Sekretarin amerikan të Energjisë, Chris Wright, dhe Sekretarin amerikan të Punëve të Brendshme, Doug Burgum. Takimet u mbajtën në kuadër të punimeve të Samitit të Partneritetit për Bashkëpunim Transatlantik në Energji (P-TEC), një nismë strategjike që synon forcimin e bashkëpunimit energjetik ndërmjet Shteteve të Bashkuara dhe vendeve të Europës Qendrore e Lindore.
Samiti u organizua nën kujdesin e Departamentit Amerikan të Energjisë, në bashkëpunim me Qeverinë Greke dhe Qendrën Globale të Energjisë pranë Këshillit Atlantik, duke mbledhur në Athinë ministra të energjisë, ekspertë dhe përfaqësues të lartë politikë nga rajoni.
Në një video-mesazh nga Athina, Zv.Kryeministrja Balluku theksoi rëndësinë e bashkëpunimit transatlantik në fushën e energjisë, duke vlerësuar mesazhin e Sekretarit Wright si një vizion frymëzues për të ardhmen energjetike të Europës.
“Sekretari i Energjisë, Chris Wright, adresoi fjalën e tij me një vizion frymëzues, i cili kishte në qendër sigurinë energjetike, bashkëpunimin transatlantik, por mbi të gjitha bashkërendimin e shteteve për të minimizuar impaktin e gazit rus në Europë,” u shpreh Balluku.
Ajo shtoi se prania e Sekretarit Amerikan të Punëve të Brendshme, Doug Burgum, në këtë samit tregon qartë rolin thelbësor që energjia luan jo vetëm në zhvillimin ekonomik, por edhe në sigurinë globale.
Pjesëmarrja e Shqipërisë në këtë forum të nivelit të lartë nënvizon angazhimin e vendit për t’u bërë pjesë aktive e dialogut ndërkombëtar mbi tranzicionin energjetik, diversifikimin e burimeve dhe forcimin e qëndrueshmërisë energjetike në rajon.
Samiti P-TEC shërben si një platformë e rëndësishme për shkëmbimin e ideve dhe politikave që synojnë reduktimin e varësisë nga burimet e paqëndrueshme të energjisë dhe nxitjen e investimeve në teknologjitë e pastra, në përputhje me objektivat e transformimit të gjelbër global.
Zëvendëskryeministrja dhe Ministrja e Infrastrukturës dhe Energjisë, Belinda Balluku, mori pjesë në takimin e 6-të të Partneritetit për Bashkëpunim Transatlantik në Energji (P-TEC), zhvilluar në Athinë, ku u diskutuan çështje kyçe të sigurisë energjetike dhe bashkëpunimit mes Shteteve të Bashkuara të Amerikës, Bashkimit Europian dhe vendeve të Europës Qendrore dhe Jugore.
Në këtë forum, Sekretari Amerikan i Energjisë, Chris Wright, shpalosi një vizion që vuri theksin te bashkërendimi mes vendeve aleate për minimizimin e varësisë europiane nga gazi rus, si dhe te roli që teknologjitë e avancuara, përfshirë inteligjencën artificiale, pritet të luajnë në transformimin e sistemit energjetik të kontinentit.
Gjatë P-TEC 6, Greqia nënshkroi një marrëveshje të rëndësishme që mundëson rritjen e aksesit të gazit të lëngshëm amerikan (LNG) në tregun europian, duke e kthyer rajonin në një nyje me rëndësi gjeopolitike strategjike. Kryeministri Kyriakos Mitsotakis njoftoi se në vitin 2024 Greqia është pozicionuar për herë të parë si eksportuese neto energjie.
Në fjalën e saj, Balluku informoi partnerët se Shqipëria ka objektiv të qartë që brenda vitit 2030 të kalojë nga një vend importues në një vend eksportues neto të energjisë. Ajo theksoi se ky vizion mbështetet në projektet strategjike të interkonjeksionit energjetik, që përfshijnë:
-Korridorin VIII energjetik, i cili shtrihet në një aks rajonal me rëndësi për shkëmbimet e energjisë;
-Korridorin Lindje–Perëndim, që lidh Rumaninë, Bullgarinë, Maqedoninë e Veriut, Shqipërinë dhe Italinë;
-Linjën e re të interkonjeksionit nën det mes Shqipërisë dhe Italisë, e cila u konsiderua nga pjesëmarrësit si një investim i domosdoshëm për sigurinë energjetike të Europës Juglindore.
“Sektori energjetik europian po hyn në një fazë të re transformimi, ku koordinimi dhe partneriteti strategjik janë çelësi për të garantuar qëndrueshmëri dhe pavarësi energjetike,” u shpreh Balluku.
Në Athinë ishte i pranishëm edhe Sekretari Amerikan i Punëve të Brendshme, Doug Burgum, me të cilin Balluku zhvilloi takim prezantues. Prezenca e tij, sipas saj, nënvizon rolin qendror që energjia ka në arkitekturën e sigurisë globale.
Balluku vlerësoi angazhimin e drejtpërdrejtë të Departamentit Amerikan të Energjisë në Europë si një garanci për forcimin e partneritetit transatlantik dhe për rritjen e qëndrueshmërisë energjetike të rajonit.
