Kreu i Komisionit të Posaçëm për Reformën Administrativo-Territoriale, Arbjan Mazniku, deklaroi se synimi kryesor i kësaj reforme është rishikimi i kompetencave të bashkive pas 10 vitesh nga reforma e vitit 2015, si dhe garantimi i një procesi gjithëpërfshirës ku opozita do të ketë të gjitha mundësitë për të qenë pjesë aktive.
I ftuar në emisionin “Tema e Ditës”, theksoi se mazhoranca është e vendosur të ofrojë të gjitha garancitë për Partinë Demokratike për të pasur një reformë gjithëpërfshirëse.
Sipas tij, synimi i reformës së re territoriale është të rishikohen kompetencat e bashkive pas 10 viteve nga reforma e vitit 2015, duke garantuar që njësitë vendore të jenë më efikente, më të afta financiarisht dhe më pranë qytetarëve.
“Është shumë e rëndësishme që opozitës t’i jepen të gjitha shanset e mundshme për bashkëpunim. Një nga aktet e para të komisionit do të jetë kërkesa formale ndaj Kongresit të Autoriteteve Vendore dhe Bashkimit Europian për të qenë partnerë në këtë reformë,” u shpreh Mazniku.
Ai kujtoi se reforma e vitit 2015 solli rezultate të prekshme për qytetarët, nga 373 bashki u kalua në 61 njësi vendore, buxhetet e bashkive u dyfishuan, borxhet u ulën ndjeshëm dhe investimet u trefishuan.
“Reforma e 2015 ka qenë një sukses. Sot më pak se 40% e fondeve të bashkive shkojnë për paga, ndërsa pjesa tjetër për investime dhe shërbime. Kjo është një arritje e madhe krahasuar me vitin 2015, kur 70% e buxhetit shkonte për paga,” tha ai.
Mazniku nënvizoi se objektivi i reformës së re është të vlerësohen të gjitha kompetencat që kanë bashkitë dhe kapacitetet e tyre për t’i zbatuar.
“Duhet parë se sa të afta janë bashkitë për të menaxhuar planifikimin urban, mbrojtjen nga zjarri, menaxhimin e mbetjeve, mbledhjen e të ardhurave dhe ofrimin e shërbimeve sekondare. Nuk duhet nisur nga numrat, por nga aftësia e njësive për të mbajtur veten financiarisht dhe për t’u ofruar qytetarëve shërbime cilësore,” theksoi ai.
I pyetur për propozimin e Partisë Demokratike për 98 bashki, Mazniku u shpreh se nuk dëshiron të hyjë në lojën e numrave.
“Unë nuk dua të bëj diskutim për më shumë apo më pak bashki, sepse kjo shpesh lidhet me objektiva elektorale. Fokusi duhet të jetë tek mekanizmat që na mundësojnë më shumë shërbime për qytetarët dhe struktura operacionale efikase,” tha ai.
Mazniku shtoi se reforma duhet të jetë në përputhje me sistemin europian, duke pasur parasysh synimin e Shqipërisë për të mbyllur negociatat në vitin 2027 dhe për t’u bërë vend anëtar i BE deri në vitin 2030.
“Bashkitë dhe rajonet tona duhet të funksionojnë në linjë me sistemin europian, për të thithur fonde nga programet e kohezionit social dhe zhvillimit strukturor,” u shpreh ai.
