Zyra e Kontrollit të Pasurive të Huaja (OFAC) e Departamentit të Thesarit të SHBA-së, në bashkëpunim me Rrjetin e Zbatimit të Krimeve Financiare (FinCEN) dhe Qeverinë e Meksikës, ka vendosur sanksione ndaj Grupit Hysa (HOCG) dhe disa institucioneve të lojërave të fatit me bazë në Meksikë, të dyshuara si të përfshira në pastrim parash dhe aktivitete të tjera kriminale transnacionale.
“Ky veprim është rezultat i bashkëpunimit të ngushtë SHBA-Meksikë për luftimin e trafikimit të drogës dhe krimit financiar të lidhur me kartelet e drogës. Shtetet e Bashkuara dhe Meksika po punojnë së bashku për të luftuar pastrimin e parave në sektorin e lojërave të fatit. Mesazhi ynë për ata që mbështesin kartelet është i qartë: Ju do të mbaheni përgjegjës. Falënderojmë Qeverinë e Meksikës për partneritetin e saj të fortë në këtë përpjekje”, deklaroi nënsekretari i Thesarit për Terrorizmin dhe Inteligjencën Financiare, John K. Hurley”, thuhet në deklaratën e Departamentit Amerikan të Thesarit.
Sipas OFAC, 27 individë dhe subjekte janë sanksionuar, ndërsa FinCEN ka propozuar një masë të veçantë për të ndërprerë aksesin e 10 institucioneve të lojërave të fatit me seli në Meksikë në sistemin financiar të SHBA-së, duke u bazuar në shqetësimet për pastrim parash.
Detajet e sanksioneve të publikuara në faqen e Departamentit të Thesarit të SHBA
“Grupi Hysa përfshin anëtarët e familjes Luftar, Arben, Ramiz, Fatos dhe Fabjon Hysa. HOCG dyshohet se përdor investime dhe kontroll mbi biznese të ndryshme në Meksikë, përfshirë lokale lojërash fati dhe restorante, për pastrimin e të ardhurave nga trafikimi i drogës, shpesh në bashkëpunim me Kartelin Sinaloa”, thotë Departamenti Amerikan i Thesarit.
Ndër subjektet e goditura janë:
Entretenimiento Palmero SA de CV
Bliri SA de CV
Cucina Del Porto SA de CV
Rosetta Gaming Inc (Kanada)
Hysa Holdings Inc (Kanada)
Një numër kompanish dhe individësh të lidhur direkt ose indirekt me grupin Hysa.
Të gjitha pronat dhe interesat e sanksionuara që ndodhen në SHBA ose në kontroll të personave amerikanë janë të bllokuara dhe çdo transaksion i paligjshëm mund të sjellë ndëshkime civile ose penale.
Veprimet e FinCEN
FinCEN ka identifikuar 10 institucione lojërash fati në Meksikë si “transaksione me shqetësim parësor për pastrim parash” dhe propozon vendosjen e masave që ndalojnë përdorimin e llogarive korresponduese në SHBA për përpunimin e transaksioneve që lidhen me këto institucione. Këto institucione përfshijnë:
Kazino Emine (San Luis Rio Colorado, Sonora)
Casino Mirage (Culiacan, Sinaloa)
Kazino Midas (Agua Prieta, Sonora; Los Mochis, Sinaloa; Guamuchil, Sinaloa; Mazatlan, Sinaloa)
Midas Casino (Rosarito, Baja California)
Kazinoja Palermo (Nogales, Sonora)
Kazino Skampa (Ensenada, Baja California; Villahermosa, Tabasco)
Qëllimi i sanksioneve
Qëllimi i këtyre masave është të ndalojë pastrimin e parave të lidhura me krimin e organizuar dhe të promovojë ndryshime pozitive në sjellje, duke goditur infrastrukturën financiare të grupeve kriminale dhe duke mbrojtur sistemin financiar të SHBA-së”. thuhet në deklaratën e Departamentit të Thesarit të SHBA-së.
Njoftim për shtyp (I PLOTË)
Thesari Amerikan dhe Qeveria e Meksikës godasin një organizatë kriminale transnacionale
13 nëntor 2025 – Washington, D.C.
Sot, Zyra e Kontrollit të Pasurive të Huaja të Departamentit të Thesarit të SHBA (OFAC) dhe Rrjeti për Zbatimin e Ligjit ndaj Krimeve Financiare (FinCEN) u bashkuan me Qeverinë e Meksikës për të goditur Grupin e Krimit të Organizuar Hysa (Hysa Organized Crime Group – HOCG) dhe një sërë biznesesh të lojërave të fatit me bazë në Meksikë, të përfshira në pastrim parash të lidhura me kartelet e drogës dhe aktivitete të tjera kriminale në Meksikë dhe Europë.
Kjo veprimtari e koordinuar është rezultat i angazhimeve të fundit SHBA–Meksikë, të dakorduara gjatë vizitës së Nënsekretarit të Thesarit për Terrorizmin dhe Inteligjencën Financiare, John K. Hurley, për të bashkëpunuar më ngushtë në luftën kundër narkotrafikut dhe krimit financiar të lidhur me kartelet dhe grupet kriminale me bazë në Meksikë.
“Shtetet e Bashkuara dhe Meksika po punojnë së bashku për të luftuar pastrimin e parave në sektorin e lojërave të fatit në Meksikë. Mesazhi ynë për ata që mbështesin kartelet është i qartë: do të mbaheni përgjegjës,”
tha Nënsekretari Hurley, duke falënderuar Qeverinë e Meksikës për partneritetin e fortë në këtë përpjekje.
OFAC shpalli sot sanksione ndaj 27 individëve dhe subjekteve, ndërsa FinCEN propozoi një masë të veçantë për të ndërprerë aksesin e 10 bizneseve të lojërave të fatit në Meksikë në sistemin financiar amerikan, për shkak të shqetësimeve serioze për pastrim parash.
SANKSIONET NDAJ GRUPIT TË KRIMIT TË ORGANIZUAR HYSA (HOCG)
Grupi i Krimit të Organizuar Hysa (HOCG), që përfshin anëtarët e familjes Luftar Hysa, Arben Hysa, Ramiz Hysa, Fatos Hysa dhe Fabjon Hysa, ka përdorur ndikimin e tij përmes investimeve apo kontrollit mbi biznese të ndryshme me bazë në Meksikë — përfshirë kazino dhe restorante luksoze — për të larë të ardhurat nga trafiku i narkotikëve.
Mendohet se HOCG operon me miratimin e Kartelit Sinaloa, i cili ushtron kontroll kriminal mbi shumicën e territorit ku grupi vepron.
Luftar Hysa, që vepron midis Meksikës dhe Kanadasë, është shpesh i pranishëm në mediat publike si figurë kryesore e familjes Hysa, duke dhënë intervista për bizneset familjare në Meksikë dhe Europë.
Luftar, Fatos, Arben dhe Fabjon kanë bashkëpunuar ngushtë me një shtetas amerikan për pastrimin e parave, përfshirë transferimin e sasisë së madhe të parasë nga Meksika në SHBA, ku kompania e shtetasit amerikan është përdorur për larjen e fondeve.
Luftar dhe Arben kanë përdorur gjithashtu një entitet të bazuar në Europë për t’u pasuruar nga larja e fondeve të paligjshme që u përkasin trafikantëve të dyshuar të narkotikëve. Luftar zotëron ose drejton disa kompani të përdorura nga HOCG.
Arben Hysa zotëron ose drejton disa kompani që veprojnë në Meksikë dhe janë pjesë e HOCG. Ai ka marrë pjesë në kontrabandën e sasisë së madhe të parave në SHBA për qëllime pastrimi, si dhe në përdorimin e kazinos dhe restoranteve luksoze në Meksikë për larjen e parave të drogës.
Ramiz Hysa ka qenë i përfshirë në përdorimin e këtyre bizneseve si mbulesë për pastrimin e të ardhurave nga shitja e narkotikëve.
Fatos Hysa, së bashku me Luftarin, Arbenin dhe Fabjonin, ka marrë pjesë në kontrabandimin e parave drejt SHBA për qëllime pastrimi, ndërsa Fatos dhe Fabjon janë përfshirë edhe në përdorimin e një entiteti evropian për t’u pasuruar nga fondet e paligjshme të trafikantëve të dyshuar.
Në kuadër të veprimit të sotëm, OFAC synon gjithashtu disa individë dhe subjekte brenda rrjetit të HOCG.
Kompania Entretenimiento Palmero S.A. de C.V., në pronësi të Arben Hysës, është qendrore në operacionet e grupit. Shtetasi meksikan Gilberto Lopez Lopez vepron si komisioner i saj, ndërsa shtetasja shqiptare me rezidencë në Meksikë Eselda Baku (ish-Hysa), vajza e Ramizit, është anëtare e bordit drejtues.
Kompanitë e tjera të përfshira në sanksione janë:
•Bliri S.A. de C.V. (Meksikë)
•Cucina Del Porto S.A. de C.V. (Meksikë)
•Diversiones Los Mochis S.A. de C.V. (Meksikë)
•El Arte de Cocinas y Beber S.A. de C.V. (Meksikë)
•Entretenimiento Villahermosa S.A. de C.V. (Meksikë)
•Entretenimiento Y Espectáculos B.C. S.A. de C.V. (Meksikë)
•Grupo Internacional Canhysamex S.A. de C.V. (Meksikë)
•H Hidrocarburos S.A. de C.V. (Meksikë)
•Hysa Forwarders S.A. de C.V. (Meksikë)
•LH Pro-Gaming S.A. de C.V. (Meksikë)
•LH Rental S.A. de C.V. (Meksikë)
•Operadora Alejil S.A. de C.V. (Meksikë)
•Operadora de Empresas LH S.A. de C.V. (Meksikë)
•Procesadora de Alimentos HS S.A. de C.V. (Meksikë)
•Rosetta Gaming S.A. de C.V. (Meksikë)
•Hysa Holdings Inc. (Kanada)
•Rosetta Gaming Inc. (Kanada)
•Rosetta Gaming SP ZOO (Poloni)
Departamenti i Thesarit po e përcakton Grupin e Krimit të Organizuar Hysa si organizatë kriminale transnacionale të rëndësishme, në përputhje me Urdhrin Ekzekutiv 13581, të ndryshuar.
Në bazë të të njëjtit urdhër, Thesari shpall sanksione ndaj Luftar Hysa, Arben Hysa, Fatos Hysa, Ramiz Hysa dhe Fabjon Hysa për lidhje direkte apo indirekte me këtë grup.
PASOJAT E SANKSIONEVE
Si rezultat i këtij veprimi, çdo pasuri ose interes në pasuri që u përket personave të sanksionuar dhe që ndodhet në SHBA, ose në posedim të personave amerikanë, bllokohet dhe duhet të raportohet në OFAC.
Po ashtu, çdo entitet që zotërohet 50% ose më shumë nga persona të bllokuar konsiderohet gjithashtu i bllokuar.
Pa një autorizim të posaçëm nga OFAC, transaksionet që përfshijnë pasuri ose interesa të këtyre personave ndalohen.
Shkeljet e sanksioneve mund të çojnë në dënime civile ose penale për persona amerikanë dhe të huaj. OFAC mund të vendosë gjoba edhe mbi bazën e përgjegjësisë absolute, ndërsa udhëzimet për zbatimin e sanksioneve ekonomike japin hollësi mbi mënyrën e zbatimit të tyre.
Institucionet financiare dhe personat që angazhohen në transaksione me personat e sanksionuar rrezikojnë përfshirjen në sanksione dytësore, përfshirë kufizimin ose ndalimin e llogarive korrespondente në SHBA.
Qëllimi i sanksioneve nuk është ndëshkimi, por ndryshimi pozitiv i sjelljes.
Për informacione mbi procesin e kërkesës për heqje nga listat e OFAC, përfshirë listën SDN (Specially Designated Nationals), referojuni udhëzimeve të OFAC mbi Kërkesat për Heqje nga Lista e Sanksioneve.
MASA E VEÇANTË E FINCEN NDAJ 10 KAZINOVE MEXIKANE
Në koordinim me OFAC dhe Qeverinë e Meksikës, FinCEN ka lëshuar njoftimin për rregullore të propozuar (NPRM), në përputhje me Seksionin 311 të Aktit Patriotik të SHBA, duke identifikuar transaksionet që përfshijnë 10 biznese të lojërave të fatit me bazë në Meksikë si burim të rrezikut të lartë për pastrim parash.
Këto biznese, që operohen nga HOCG dhe janë përdorur prej vitesh për të pastruar paratë e Kartelit Sinaloa, janë:
•Emine Casino – San Luis Río Colorado, Sonora, Meksikë
•Casino Mirage – Culiacán, Sinaloa, Meksikë
•Midas Casino – Agua Prieta, Sonora, Meksikë
•Midas Casino – Los Mochis, Sinaloa, Meksikë
•Midas Casino – Guamuchil, Sinaloa, Meksikë
•Midas Casino – Mazatlán, Sinaloa, Meksikë
•Midas Casino – Rosarito, Baja California, Meksikë
•Palermo Casino – Nogales, Sonora, Meksikë
•Skampa Casino – Ensenada, Baja California, Meksikë
•Skampa Casino – Villahermosa, Tabasco, Meksikë
FinCEN propozon që këtyre bizneseve t’u ndërpritet qasja në sistemin financiar amerikan, duke ndaluar bankat dhe institucionet financiare të hapin ose të mbajnë llogari korrespondente për bankat e huaja që përpunojnë transaksione me to, si dhe duke kërkuar kontroll të shtuar të kujdesit (due diligence) për të parandaluar përdorimin e këtyre llogarive për pastrimin e parave.
