Ka nisur punën këtë të martë Komisioni i Reformës Zgjedhore, i ngritur për të rishikuar ligjin për zgjedhjet, edhe për shkak të rekomandimeve të OSBE/ODIHR. Nga mazhoranca, përveç përfaqësuesve të Partisë Socialiste, i pranishëm ishte edhe Tedi Mulaj nga Partia Social Demokrate. Ndërsa nga opozita mungon deputeti i Partisë Mundësia. Gjithashtu edhe 2 anëtarët e tjerë të cilët janë pa të drejtë vote, nga koalicioni “Shqipëria Bëhet” dhe Lëvizja Bashkë, nuk janë të pranishëm, shkruan A2 CNN.
“Është detyrim i Komisionit Europian, sidomos përmbushja e pikës së transparencës së financimeve të partive. Ligji nuk është i vështirë, e bën të vështirë politika”, tha bashkëkryetari socialist i komisionit, Damian Gjiknuri. “Ju bëj thirrje atyre që mungojnë, të marrin pjesë, të kontribuojnë. Të mos e bëjnë debatin jashtë, por në këtë sallë. Ata e kritikojnë sistemin, edhe pse janë këtu pikërisht prej këtij sistemi”.
Ndërsa bashkëkryetari nga radhët e opozitës, Oerd Bylykbashi, tha se topi është në fushën e maxhorancës që të tregojë se reforma ka sukses. “Mund të shtojmë nene pa fund, por për sa kohë Kryeministri del e thotë “nuk e zbatoj ligjin, ligji është kinezëri”, ai nuk ka efekt. Angazhimi maksimal i opozitës është që të angazhohet që të gjitha problemet e adresuara nga OSBE/ODIHR të arkivohen si të zgjidhura. Praktika ka treguar se kemi ndërhyrë edhe në ligje të tjera, përveç atij të zgjedhjeve. Nëse do të jetë e nevojshme duhet të shkojmë atje për t’i zgjidhur. Problemet e zgjedhjeve janë probleme keq qeverisje. Një pjesë e problemeve nuk zgjidhen me kod zgjedhor”, tha ai.
Në mbledhjen e tij të parë, socialistët nuk i nxorën të gjitha kartat mbi tavolinë, por treguan se janë të hapur për çdo çështje, edhe përtej rekomandimeve të ODIHR-it.
Demokratët, më shumë sesa optimistë, janë skeptikë për besnikërinë e socialistëve sa i përket konsensusit. Ndryshimet kushtetuese pesë vite më parë, të bëra në mënyrë të njëanshme nga mazhoranca, konsiderohen si një precedent i rrezikshëm.
Opozita listoi çështjet që janë shqetësuese: listat, shitblerja e votës, sanksionet penale deri te vota e emigrantëve, por me një objektiv të qartë — rikthimin e koalicioneve parazgjedhore.
Folësit e shumtë nga radhët e opozitës dhe akuzat e tyre ndaj mazhorancës vunë në lëvizje edhe socialistët, të cilët mbrojtën rezultatin e 11 majit, shkruan A2 CNN.
Deputeti demokrat Arjan Ndoi tregoi arsyet pse opozita nuk e braktis Parlamentin.
Pavarësisht mungesës së besimit nga ana e demokratëve, socialistët synojnë t’i mbyllin ndryshimet në Kod brenda vitit 2026.
Në konstituimin e komisionit të posaçëm mungoi anëtari i Partisë së Mundësisë, ndërsa të dy bashkëkryetarët vendosën t’i drejtohen ODIHR-it dhe Komisionit të Venecias me një letër për ekspertizën e tyre. Politika shqiptare ka ende nevojë për arbitër ndërkombëtarë
