Deklaratat e reja nga Sekretari i Shtetit i SHBA-së, Marco Rubio, në Gjenevë sugjerojnë se bisedimet midis Shteteve të Bashkuara dhe Ukrainës mbi një plan paqeje janë në një fazë të avancuar, me të cilin ai raporton “përparim të konsiderueshëm”.
Duke folur me gazetarët pas informimit të tij fillestar më herët gjatë ditës, Rubio tha se “ndihet shumë optimist” se mund të arrihet një marrëveshje. “Kemi bërë përparim të jashtëzakonshëm”, theksoi ai, duke përdorur një ton pozitiv, por duke shmangur dhënien e ndonjë detaji specifik rreth përmbajtjes së planit.
Pavarësisht retorikës pozitive, ai sqaroi se ky nuk është ende një rezultat përfundimtar: “Nuk dua të flas për fitoren apo finalizimin. Ka ende punë për t’u bërë, por ne jemi shumë më përpara sot sesa ishim këtë mëngjes dhe sigurisht më përpara sesa ishim një javë më parë”.
Kreu i diplomacisë amerikane nuk u zotua për afatin e së enjtes të vendosur nga Trump për përfundimin e marrëveshjes, duke thënë vetëm se shpreson se do të ketë një rezultat “së shpejti”. Në pyetjet e vazhdueshme nga gazetarët, ai përsëriti se nuk do të hyjë në detaje, pasi plani është ende “në zhvillim e sipër”.
Në përfundim, Rubio deklaroi: “Thjesht na duhet më shumë kohë sesa kemi sot. Unë besoj sinqerisht se do t’ia dalim mbanë”.
Nesër, delegatët në Gjenevë do të vazhdojnë të punojnë drejt një plani paqeje, tha Rubio.
