Sondazhi i Këshillit Rajonal të Bashkëpunimit mbi burimet e dezinformimit dhe njëanshmërisë tregon se në Shqipëri publiku është veçanërisht kritik ndaj rrjeteve të influencuesve dhe aktorëve politikë, ndërsa është dukshëm më i butë ndaj gazetarëve të pavarur.
Për influencuesit e rrjeteve sociale, 57% e të anketuarve në Shqipëri i shohin si burim dezinformimi dhe 23% si të njëanshëm, ndërsa vetëm 10% i konsiderojnë neutralë. Politikanët vlerësohen në mënyrë më skeptike: 32% i etiketon si burim dezinformimi dhe 63% si të njëanshëm, duke e çuar perceptimin negativ mbi ta në rreth 95% të përgjigjeve.
Edhe partitë politike janë në qendër të mosbesimit, me 28% që i shohin si burim dezinformimi dhe 69% si të njëanshme, ndërsa vetëm 2% i quajnë neutralë. Në kontrast, gazetarët e pavarur dalin shumë më mirë: 30% i cilëson si burim dezinformimi, por një shumicë relative prej 47% i sheh të paanshëm, çka e bën Shqipërinë një nga vendet ku ky grup gëzon perceptimin më të favorshëm.
Krahasuar me fqinjët, tabloja ndryshon. Në Bosnje and Herzegovinë, politikanët shihen kryesisht si të njëanshëm (44%) dhe si burim dezinformimi (36%), por besimi te gazetaria e pavarur është pak më i dobët se në Shqipëri: 31% neutralë dhe 25% i shohin si burim dezinformimi.
Në Kosovë, skepticizmi ndaj politikës është ekstrem: deri në 84% e konsiderojnë politikën burim dezinformimi ose njëanshmërie, ndërsa partitë marrin vlerësim negativ nga shumica dërrmuese (63% i njëanshëm). Edhe influencuesit nuk kalojnë pa kritika, me 49% që i quajnë të njëanshëm, por ndryshe nga Shqipëria, këtu gazetaria e pavarur shihet më shpesh si burim dezinformimi (37%) sesa neutrale (31%).
Në Mal të Zi, politikanët (36% dezinformim, 32% njëanshmëri) dhe partitë (28% dezinformim, 47% njëanshmëri) mbeten në krye të mosbesimit, ndërsa niveli i neutralitetit për gazetarët e pavarur rritet në 42%, afër Shqipërisë. Ndërsa në Maqedoninë e Veriut politikanët konsiderohen kryesisht të njëanshëm (54%) dhe partitë gjithashtu (45%), ndërsa gazetarët e pavarur përfitojnë nga një perceptim më i balancuar sesa në Kosovë: 33% i quajnë burim dezinformimi dhe 45% neutralë.
Në Serbi, tabloja është e ngjashme me Shqipërinë për nga dyshimi ndaj politikës, por edhe më e ashpër ndaj partive, ku 42% i quajnë të njëanshme; megjithatë për gazetarët e pavarur neutraliteti bie në 37% dhe rritet perceptimi si burim dezinformimi (35%). Mesatarja e Ballkanit Perëndimor e vendos rajonin në një linjë të qartë dyshimi ndaj politikës dhe influencuesve, me politikanët që marrin 53% etiketimin “të njëanshëm” dhe partitë 51%, ndërsa gazetarët e pavarur mbeten grupi me vlerësimin më pozitiv por larg idealit (39% neutralë).
