Kryetari i Partisë Demokratike, Sali Berisha, zhvilloi një konferencë të gjatë për shtyp ku iu përgjigj pyetjeve të ndjekësve të tij në rrjetet sociale.
Berisha u ndal tek analiza e humbjes së zgjedhjeve të 11 majit, duke e cilësuar procesin si farsë dhe duke theksuar se dorëheqja në këto kushte do t’i shërbente vetëm kryeministrit Rama.
“PD është një parti e cila përcakton fatin e drejtuesve dhe anëtarëve të saj nëpërmjet votës. Në kushtet e një pluralizmi funksional nuk ka asnjë dyshim që humbja e zgjedhjeve është kriteri më i shëndoshë për dorëheqjen e atyre që drejtojnë, por në kushtet e farsës elektorale dhe narkoshtetit, në kushtet kur zgjedhjet janë farsë një akt i tillë do i shërbente diktatorit dhe atyre që shtypin pluralizmin. Një akt i tillë nuk mund të ndodhë përveç votës së demokratëve shqiptarë. Të ftoj të përdorësh votën tënde sipas vullnetit që ke ose të marrësh pjesë në të gjithë garat e kësaj partie. Në kushtet e diktaturave autoritare largimi nga misioni dhe qëndrimi në opozitë është një mision, largimi nga misioni, bëhet vetëm nëpërmjet votës”, tha Berisha.
Ai paralajmëroi se protestat do të shtrihen në të gjithë vendin, duke nisur këtë javë me foltoret jashtë Tiranës.
“Këtë javë fillojmë foltoret jashtë kryeqytetit dhe do të vazhdojmë në çdo qytet të Shqipërisë,” tha kreu i PD-së, duke shtuar se opozita do të intensifikojë aksionin politik.
Berisha u shpreh se nëse zgjedhjet do ishin me votë të lirë, dorëheqja do ishte një akt i shëndoshë dhe ai do e kishte bërë.
Gjatë bisedës, kryedemokrati komentoi edhe “kafenë” e disa kandidatëve të PD-së në listat e hapura, të ftuar nga Ervin Salianji dhe Ilir Alimehmeti. Berisha tha se askush nuk është i përjashtuar nga partia.
“Kandidatët e primareve në tërësi i kam takuar ose i kam telefonuar. Vetë Salianji ka qenë disa herë në këtë zyrë. Ilir Alimehmeti edhe më shpesh. Në këtë kontekst askush nuk është i përjashtuar në këtë parti”, tha Berisha.
