Në Spitalin Onkologjik pranë Qendrës Spitalore Universitare “Nënë Tereza” janë përmirësuar kushtet e trajtimit për pacientët që i nënshtrohen kimioterapisë, pas një ndërhyrjeje të realizuar nga Fondacioni Mane. Investimi ka adresuar drejtpërdrejt nevojat e një shërbimi ku çdo ditë trajtohen pacientë nga e gjithë Shqipëria.
Në kuadër të kësaj ndërhyrjeje, Fondacioni Mane ka dhuruar 30 poltronë të rinj me parametra modernë, ka riparuar shtatë poltronë ekzistues dhe ka kontribuar në përmirësimin dhe zgjerimin e hapësirës së trajtimit. Për herë të parë është krijuar edhe një ambient i ri i dedikuar për marrjen e kimioterapisë ditore, tashmë plotësisht funksional dhe në dispozicion të pacientëve.
“Aktualisht kemi shtuar dhe ekselatorin e tretë, që është një ndihmë akoma më e madhe për trajtimin e pacientëve. Të gjithë po punojnë në një drejtim që të ofrojmë trajtim me dinjitet”, u shpreh Helidon Nina, Shef i Pavionit të Onkologjisë në QSUNT.
Pavioni i rinovuar u vizitua edhe nga presidenti i Fondacionit Mane, Samir Mane, i cili u tregua i gatshëm për ta shtrirë këtë nismë në të gjithë vendin.
Kjo ndërhyrje është pjesë e misionit të Fondacionit Mane për të mbështetur shëndetin dhe mirëqenien në komunitet, përmes investimeve me ndikim të drejtpërdrejtë dhe të menjëhershëm në jetën e njerëzve.
