Sekretari Amerikan i Shtetit Marco Rubio ka deklaruar këtë të enjte se Shtetet e Bashkuara po vendosin sanksione ndaj dy gjyqtarëve të tjerë të Gjykatës Ndërkombëtare Penale (ICC) për shënjestrimin e Izraelit, duke e çuar në 11 numrin e zyrtarëve të lartë të gjykatës nën sanksione amerikane.
“Sot, po vendos sanksione ndaj dy gjyqtarëve të Gjykatës Ndërkombëtare Penale (ICC), Gocha Lordkipanidze nga Gjeorgjia dhe Erdenebalsuren Damdin nga Mongolia, në bazë të Urdhrit Ekzekutiv 14203,” tha Rubio në një deklaratë, duke iu referuar një urdhri të nënshkruar nga presidenti Donald Trump në shkurt për sanksionimin e gjyqtarëve dhe prokurorëve të ICC-së.
“Këta individë janë angazhuar drejtpërdrejt në përpjekjet e ICC-së për të hetuar, arrestuar, ndaluar ose ndjekur penalisht shtetas izraelitë, pa pëlqimin e Izraelit,” shtoi ai, citon Reuters.
Në deklaratën e tij, Rubio iu referua përfshirjes së gjyqtarëve në votimin për të rrëzuar një nga sfidat ligjore të Izraelit kundër hetimit të ICC-së mbi veprimet e tij në luftën e Gazës këtë javë. Gjyqtarët e përmendur ishin pjesë e një paneli që refuzoi të përmbyste një vendim të një gjykate më të ulët, sipas të cilit hetimi i prokurorisë për krime të dyshuara nën juridiksionin e saj mund të përfshinte ngjarjet pas sulmit ndaj Izraelit nga grupi militant palestinez Hamas më 7 tetor 2023.
ICC tha se dënon raundin e ri të sanksioneve, i cili është i katërti për këtë vit. “Këto sanksione janë një sulm flagrant ndaj pavarësisë së një institucioni gjyqësor të paanshëm,” thuhet në deklaratë, duke shtuar se masat rrezikojnë rendin juridik ndërkombëtar.
Shtetet e Bashkuara dhe Izraeli nuk janë anëtarë të ICC-së, por territoret palestineze u pranuan si shtet anëtar në vitin 2015. Vitin e kaluar, gjykata lëshoi urdhër-arreste për Benjamin Netanyahun dhe ish-ministrin e mbrojtjes Yoav Gallant për krime lufte dhe krime kundër njerëzimit, përfshirë përdorimin e urisë si armë lufte, të kryera në Gaza.
Sanksionet e SHBA-ve të vendosura në shkurt përfshinin ngrirjen e çdo aktivi në SHBA të personave të sanksionuar dhe ndalimin e tyre dhe familjeve të tyre nga vizitat në Shtetet e Bashkuara.
