24 dhjetor 2025 – Autoriteti Kombëtar i Ushqimit (AKU) njofton se gjatë kontrolleve të ushtruara së fundmi nga Drejtoria Rajonale Tiranë, janë konstatuar shkelje ligjore në një subjekt ushqimor.
Inspektorët kanë bllokuar 5 ton djathë “Gouda” dhe 944 kg fileto pule për mungesë të kundraetiketës në gjuhën shqipe. Subjekti mori gjobë dhe produktet mbeten të bllokuara deri në rregullimin e dokumentacionit dhe etiketimit.
“AKU garanton opinionin publik se do të vijojë kontrollet rigoroze në të gjithë zinxhirin ushqimor për të garantuar zbatimin e ligjit dhe informimin e saktë të konsumatorëve, me qëllim mbrojtjen e shëndetit dhe interesave të tyre”, thuhet në faqen zyrtare.
Kujtojmë se në fillim të këtij muaji, AKU bllokoi dy ngarkesa me misër që vinin nga Serbia, pasi rezultuan me Aflatoksinë B1. Edhe në nëntor, u bllokuan 25 ton misër po nga Serbia.
Të shumta kanë qenë rastet kur produktet e importuara kanë rezultuar me pesticide, siç ishte rasti i pjeshkëve në shtator apo domateve.
Me një sërë rastesh problematike të konstatuara, këtë vit nisi edhe aksioni kundër tregtimit të bulmetit pa faturë, ndërsa për sigurinë ushqimore u ngrit një komision për vlerësimin e inspektorëve që punojnë në AKU.
Mishi i pulës me salmonelë ka qenë një fenomen i përsëritur herë pas here, aq sa janë raportuar helmime në qytete të ndryshme të vendit.
Autoriteti Kombëtar i Ushqimit është kritikuar shpesh edhe nga kryeministri Edi Rama, ndërsa Fatjon Pasholli dha dorëheqjen pas vetëm 4 muajsh në postin e drejtuesit të AKU. Vendin e tij e zuri Alketa Hoxha.
