Presidenti i Republikës, Bajram Begaj, priti sot në një takim zyrtar ambasadoren e re të Greqisë në Tiranë, Lambrini Komini, e cila i paraqiti Letrat Kredenciale për të nisur misionin e saj diplomatik në Shqipëri.
Ceremonia e dorëzimit të letrave shërbeu gjithashtu si një mundësi për të rikonfirmuar vullnetin e mirë mes dy vendeve. Gjatë bisedës, u vendos theksi te forcimi i marrëdhënieve të fqinjësisë së mirë, si dhe te thellimi i bashkëpunimit strategjik në kuadër të Aleancës së Atlantikut të Veriut (NATO).
Pas takimit, Presidenti Begaj reagoi përmes një postimi në platformën “X”, ku vlerësoi diskutimin me diplomaten e re.
“Sot, mora Letrat Kredenciale të Ambasadores së re të Republikës së Greqisë, znj. Lambrini Komini. Diskutuam forcimin e marrëdhënieve si vende fqinje dhe avancimin e bashkëpunimit tonë afatgjatë si partnerë të NATO-s”, theksoi Kreu i Shtetit.
