Sipërmarrësi shqiptar Shpëtim Puca, prodhues i mjeteve “Made in Albania”, ka reaguar publikisht përmes një statusi në rrjetet sociale, duke shprehur zhgënjimin dhe revoltën e tij ndaj, sipas tij, neglizhencës së drejtuesve vendorë për të përdorur kapacitetet vendase në shërbim të qytetarëve në situatën aktuale që po kalon Shqipëria me përmbytjet dhe reshjet e dëborës.
Në reagimin e tij, Puca thekson se nuk është i gatshëm të shesë mjetet “me zor” dhe as të presë në dyert e kryetarëve të bashkive për t’u lutur që ato të përdoren. Ai e konsideron këtë si një cenim të karakterit dhe dinjitetit personal, duke nënvizuar se më mirë të humbasë financiarisht sesa të humbasë parimet.
Statusi shoqërohet edhe me foto të mjeteve borepastruese të prodhuara dhe të gatshme për përdorim, ndërkohë që shumë zona të vendit po përballen me situata të vështira për shkak të motit ekstrem, borës dhe bllokimit të akseve rrugore. Sipas sipërmarrësit, është paradoksale që mjete të prodhuara nga një shqiptar, në Shqipëri, të mos vihen në funksion për t’i shërbyer popullit shqiptar në momente emergjence.
Reagimi i Pucës hap një debat më të gjerë mbi mbështetjen reale që institucionet publike u japin prodhuesve vendas, veçanërisht në sektorë strategjikë si menaxhimi i emergjencave dhe infrastruktura rrugore. Ai ngre pikëpyetje mbi politikat e prokurimit, prioritetet e bashkive dhe raportin mes deklaratave për nxitjen e prodhimit vendas dhe praktikës konkrete në terren.
Në një kohë kur kushtet e motit po testojnë kapacitetet e pushtetit vendor dhe solidaritetin institucional, rasti i bërë publik nga Shpëtim Puca rikthen në vëmendje nevojën për bashkëpunim real mes sektorit publik dhe sipërmarrjes shqiptare, jo vetëm si zgjedhje ekonomike, por edhe si përgjegjësi ndaj qytetarëve që përballen me pasojat e motit ekstrem. /ekofin.al
