Drama familjare norvegjeze “Sentimental Value”, me regji të Joachim Trier, ishte fituesja kryesore e Çmimeve Evropiane të Filmit të këtij viti, të mbajtura të shtunën në Berlin.
Filmi, që trajton marrëdhënien e ndërlikuar mes një babai të munguar dhe vajzës së tij, tregon historinë e një regjisori filmi që përpiqet të rilidhet me të bijën, tashmë aktore e suksesshme. Në rolet kryesore interpretojnë Stellan Skarsgard dhe Renate Reinsve.
“Sentimental Value” u vlerësua me çmimin për Filmin Evropian, ndërsa Joachim Trier fitoi çmime si për regjinë, ashtu edhe për skenarin. Skarsgard dhe Reinsve u shpërblyen në kategoritë e aktrimit, duke e çuar numrin total të çmimeve të filmit në gjashtë, përfshirë edhe një nominim për kompozitoren Hania Rani.
Një tjetër fitues i madh i mbrëmjes ishte filmi spanjoll “Sirat”, një triller mbijetese i regjisorit Oliver Laxe, i cili fitoi pesë çmime, kryesisht në kategoritë teknike si kinematografia, montazhi dhe dizajni i zërit.
Në event ishte i pranishëm edhe regjisori iranian Jafar Panahi, i cili përdori skenën për të tërhequr vëmendjen ndaj situatës politike në Iran. Ai tha se mungesa e reagimit ndërkombëtar ndaj dhunës përbën rrezik jo vetëm për Iranin, por për gjithë botën.
Në prapaskenë, Stellan Skarsgard komentoi edhe deklaratat e presidentit amerikan Donald Trump lidhur me Grenlandën, duke i cilësuar ato si të rrezikshme dhe të nxitura nga ambicie personale.
I pyetur për mundësinë e një fitoreje në Çmimet Oscar, pas suksesit të tij të fundit në Golden Globe, Skarsgard u shpreh skeptik, duke theksuar se asnjë aktor mashkull skandinav nuk ka fituar ende një Oscar.
